Published on

Cristy Per Minute ni Cristy FerminSetyembre 16-30, 2020

     liza soberano
 
Liza Soberano
  Lotlot
 
Lotlot de Leon
  TED FAILON
 
Ted Failon
  darren
 
Darren Espanto
  Rustom Padilla
 
Rustom Padilla
  Kris Aquino
  Kris Aquino IG post
 
Kris Aquino at kaniyang IG post
  Sharon Cuneta
 
Sharon Cuneta
  Jim Paredes
 
Jim Paredes

Liza Soberano – Sobrang iniingatan ng Kapamilya network

Totoong-totoo na kinukuha ng GMA-7 at TV5 ang serbisyo ni Liza Soberano. Nakausap na ng mga emisaryo ng dalawang istasyon ang kaniyang manager na si Ogie Diaz.

Sa pagpapakandado sa ABS-CBN ay walang ibang hinahanap ngayon ang mga artista ng network kundi trabaho. Ang iba ay mayroon na, pero mas maraming wala pa, kaya maraming personalidad na pumapailalim ngayon sa depresyon.

Pero iba ang kaso ng napakagandang young actress, siya ang nilalapitan ng oportunidad, hindi siya ang naghahanap. Pero maingat sila ng kaniyang manager sa pagkilos, hindi sila agad-agad naghahangad ng pagkakakitaan, naghihintay pa sila ng hinog na pagkakataon.

Isa si Liza Soberano sa mga iniingatan ng Kapamilya network. Hanggang maaari, hanggang kaya pa naman nila ng kaniyang manager, ay huwag muna silang lumundag ng bakod.

Nakalinya na ang pelikulang gagawin nila ng kaniyang boyfriend na si Enrique Gil, malaki na ang napatunayan ng kanilang loveteam sa takilya, mahirap nga namang basta pakawalan ang mga talentong tulad nila.

Lotlot de Leon – Tinatawag na maldita at walang utang na loob ng mga Noranians

Komento ng isang kaibigan namin ay hindi rin natin masisisi ang mga namba-bash kay Lotlot de Leon kung bakit siya tinatawag na maldita at walang utang na loob.

Nagkumpara ang mga kumokontra kay Lotlot, hindi rin kasi maganda ang relasyon nila ng kaniyang dating biyenang si Pilita Corales, dahil sa kaniyang kamalditahan.

Dagdag na impormasyon pa ng aming kausap, “Wala namang kasundo si Lotlot, di ba? Ang dati niyang biyenan, ang mommy niyang si Nora Aunor, alangan namang parehong mali ang mga mas nakatatanda sa kaniya?

“Maldita kasi siya, daldal nang daldal, sarcastic pa siya. Walang pinakamaganda kundi ang manahimik na lang siya!” pahayag nito.

Anuman ang pinagdaanan ng mag-ina noong bata pa si Lotlot ay tanging sila lang naman ang nakakaalam. Wala namang nakasaksi kung paano siya tinrato ng taong umampon sa kaniya.

May suntok sa puso ang kuwento ni Balot na noong bata pa sila ni Ian de Leon ay wala siyang karapatang makatikim ng mga de-lata sa kanilang cabinet. Ang sabi raw kasi ng yaya ni Ian ay para lang iyon sa kaniyang kapatid na itinuturing.

De-lata pa lang iyon. Paano pa ang mas malalaking kuwentong nakagarahe lang sa utak at puso ni Lotlot? Alam ba iyon ng mga humuhusga at bumibira sa kaniya ngayon?

Inuulit namin, maglabas man ng mga kuwento si Lotlot tungkol sa malungkot niyang pagkabata sa poder ni Nora Aunor ay siya pa rin ang mapapasama.

Magiging dakila pa rin ang Superstar sa mata ng publiko dahil hindi lahat ay magkakaroon ng pusong kumupkop, magmahal, magpalaki at kumandili sa mga sanggol na ni gapatak na dugo ay walang kuneksiyon sa kaniya.

Sa totoong-totoo lang.

Ted Failon – Selyado na ang kontratang pinirmahan sa TV5

Selyado na ang kontratang pinirmahan ng magaling na broadcaster na si Ted Failon at ng mga ehekutibo ng TV5. Wala nang urungan ito.

Plantsado na ang programang gagawin niya sa Radyo Singko, 92.3 News FM, kasama ang matagal na niyang kabig na si DJ Chacha. Apat na oras tuwing umaga ang nakaplantilyang oras ng kanilang programa sa Radyo Singko.

Natural lang na kapag may bagong personalidad na papasok ay magkaroon ng mga pagbabago sa programming. Ang tanong ng marami, kani-kaninong programa kaya ang mawawala o mauurong ng oras, para maibigay kay Kuyang Ted.

Isang napakalaking karagdagan sa Radyo Singko ang pagdating ni Ted Failon dahil matindi na ang kaniyang napatunayan sa tatlong dekadang paglilingkod niya nang tapat sa DZMM ng ABS-CBN.

Nanatili siyang nakikipaglaban para sa kaniyang paninindigan, isang dating pangulo pa nga ang nagtangkang ipatanggal siya sa puwesto dahil sa mga opinyong pinakakawalan niya sa kaniyang programa, pero hindi ito nagtagumpay.

Hindi natinag si Ted Failon sa kaniyang paniniwala, inilalantad niya ang mga katiwaliang nagaganap, palaging ang kapakanan ng ating mga kababayan ang una para sa kaniya.

Tabi-tabi na lang sa mga tiwaling pulitiko, sorry na lang sa mga opisyal ng pamahalaan na ginagamit ang kanilang kapangyarihan sa pangungurakot ng pera ng bayan, nandito na uli si Ted Failon!

Maraming kaibigan ang tumatawag sa amin, winewelkam nila sa Radyo Singko ang magaling na broadcaster, hindi na raw sila maglilipat ng istasyon ngayong Kapatid na si Ted Failon.

Aba, may Raffy Tulfo na ang Radyo Singko na matagumpay, kakambalan pa ito ng isang Ted Failon na wala ring inuurungan, saan pa nga naman tayo?

Siguradong tumatayo na ang mga balahibo ngayon ng mga pulitikong hindi tapat sa sinumpaan nilang tungkulin. Babalahibuhan sila ni Ted, ilalantad niya ang mga katiwaliang suportado ng mga ebidensiya, kaya wala silang lusot!

Iniingatan ni Ted Failon ang kaniyang propesyon, hindi niya ibinebenta ang kaniyang mga atake, kung gaano siya katinding bumira sa mga tiwali ay ganoon din kabukas ang kaniyang bibig sa pagpuri sa mga taong-pamahalaan kapag wasto ang kanilang ginagawa para sa ating bayan.

Darren Espanto – “Straight ako!”

Buong-ningning na isinigaw ni Darren Espanto, “Straight ako!” Napapanahon ang matapang na komento ng magaling na singer na straight siya, iyon kasi ang gustong isubo ng isang beking namamalimos ng awa mula sa isang male personality, pero hindi naman ito pinapansin.

Matagal na nga namang pinagdududahan ang kaniyang gender, noong nasa The Voice Teens pa lang siya ay may alimuom na tungkol doon, dahil lang sa ang mga piyesang kinakanta niya ay pambabae.

Mataas pa kasi ang boses noon ni Darren dahil binatilyo pa lang ang kaniyang edad, naaabot niya ang pinakamatataas na nota, pero ngayong binata na siya ay mahihirapan na siyang bumirit.

Sa mga huling episodes ng ASAP Natin ‘To ay napanood namin si Darren, nasa Calgary, Canada siya noon, via Zoom ang kaniyang performance.

Ibang-iba na ang kaniyang boses, bumaba na ang kaniyang pitch, napakasuwabe niyang kumanta na sinasabayan pa niya ng pagsayaw na mahirap gawin.

Ang isyu tungkol sa kaniyang gender ang sumira sa pagkakaibigan nila ni JK Labajo na kapareho niyang produkto ng TVT, humantong pa nga iyon sa husgado, tahimik ang magkabilang panig tungkol sa issue.

Sabi ng kaibigan naming professor, “Nakakaawa ang mga personalities na hinuhusgahan nang dahil lang sa mga songs na pinipili nilang kantahin.

“Porke ba pambabae ang kanta, e, bading na ang singer? Porke ba bumibirit, e, bakla na? Huwag naman sanang ganoon. Secure na secure si Darren sa masculinity niya.

“Kaya niyang ipagsigawan na straight siya dahil kilalang-kilala niya ang sarili niya. Nice one!” sabi pa ni prop.

Rustom Padilla – Sino ba talaga ang ‘Ilusyunada?”

Naglagutukan ang mga buto sa buong katawan ni Rustom Padilla sa hindi niya inaasahang pagngangalit ng publiko lalo na ng mga miyembro ng LGBTQ na humusga, kumuwestiyon at tumawag sa kaniyang ilusyunada dahil sa mga rebelasyon niya tungkol kay Piolo Pascual.

Akala siguro ni Rustom ay makakaya niyang paniwalain ang lahat ng tao sa lahat ng pagkakataon. Pero sumpa ng mga sumpa! Sa kaniyang mukha mismo bumalandra ang kaniyang mga kadramahang siya lang naman ang naniniwala.

Umurong na sa laban si Rustom. Ipagpapatuloy pa rin daw niya ang kaniyang mga rebelasyon sa You Tube, pero hindi na iyon para sa lahat, eksklusibo na ang gagawin niyang atake. Pero may bayad.

May membership fee na ang pagtutok sa kaniyang You Tube vlog, humihingi siya ng tulong ngayon sa kaniyang mga tagasuporta na ipagpatuloy ang pagtutok sa kaniya, pero may kailangan silang bayaran para maging regular silang viewer ng mga kadramahan ni Rustom Padilla.

Pinabulaanan niya ang komento ng mas nakararami na kaya lang daw niya isinasangkot sa kaniyang vlog ang mga sikat na personalidad ay para tumaas ang kaniyang views. Wala raw katotohanan iyon.

Kaya para patunayan niyang walang katotohanan iyon ay hindi na para sa malayang publiko ang magiging paraan niya, by membership na lang daw, kailangang magbayad ang tututok sa kaniya nang 199-299$.

Umaaringking pa hanggang ngayon ang katawan ng dating aktor na transgender na ngayon dahil sa masasakit na salitang ikinukulapol sa kaniya sa social media.

Iyon ang dahilan kung bakit may exclusivity na ang pagtutok sa kaniya. Sa mga panahong ito nga naman ng pandemya ay para-paraan lang ang kailangan.

Tawa kami nang tawa nina Manay Lolit Solis at Ogie Diaz dahil pati kaming tatlo ay isinali na rin ni Rustom Padilla a.k.a. BB Gandanghari sa kaniyang mga kalokahan.

Bakit daw namin siya sinasabihang ilusyunada? Nandoon daw ba kami sa hotel noong may mangyari sa kanila ng male personality na itinago niya sa pangalang Jonathan?

Ha! Ha! Ha! Ha!

Mga sinungaling daw kami, mga tsismosoa, wala raw naman kaming alam tungkol sa tunay na namagitan sa kanila ni Jonathan na paminsan-minsan ay natatawag niyang Piolo sa kaniyang vlog.

Ha! Ha! Ha! Ha!

Baril nang baril si Rustom nang walang direksiyon, pinakikialaman niya pati ang opinyon at komento ng mga kumokontra sa kaniya, ang gusto niya ay maniwala rin kaming tatlo sa kaniyang mga ilusyon.

Ha! Ha! Ha! Ha!

Sabi pa ni Rustom ay mas malaswa raw ang ginagawa ng mga kloseta, ng mga pamintang durog na sa dilim ginagawa ang kanilang mga kababalaghan, iyon daw ang dapat naming kalampagin at hindi siya na nagsisiwalat lang naman ng katotohanan tungkol sa naganap sa kanila ni Jonathan.

Ha! Ha! Ha! Ha!

At dati raw ay kami pa ang nagba-blind item kay Piolo, tumitigil lang daw kami kapag binigyan na kami ng pera ng aktor, mas matindi ang ilusyong iyon ni Rustom.

Ha! Ha! Ha! Ha!

Pati si AiAi delas Alas na nagpayo lang naman sa kaniya na tantanan na niya ang nananahimik na si Piolo ay tinawag pa niyang plastic, ipokrita at kaibigang putik.

Ha! Ha! Ha! Ha!

Ang gusto kasi ni Rustom Padilla, ang lahat ng isinusubo niyang impormasyon sa kaniyang vlog ay kailangang paniwalaan ng buong mundo, kahit pa alam niya naman sa kaniyang sarili na kathang-isip lang ang mga pinagsasasabi niya.

Ha! Ha! Ha! Ha!

Ilusyunada!

Kris Aquino ­– May mas “more viable” daw na ipinalit sa kaniya ang TV5

Pinagpipistahan na ang balita na si Korina Sanchez ang ipinalit kay Kris Aquino sa isang programang plantsado na sanang eere sa TV5.

Si Korina pala ang tinutukoy ni Kris na “more viable” sa kaniyang IG post. Diretsong inanunsiyo ni Kris na wala na siyang gagawing programa sa network dahil pinalitan na siya ng mga prodyuser.

Nagtatakang tanong ni SOS na hindi napag-iiwanan sa mga nagaganap sa showbiz, “Iyon po ang sabi ni Kris sa IG post niya. Kaya raw hindi na tuloy ang show niya sa TV5, e, dahil pinalitan na siya ng producer ng isang mas viable kesa sa kaniya.

“Iyon daw ang truth from her. Ang tanong lang po namin, e, sino naman kaya ang mas viable na ipinampalit sa kaniya? May mas viable pa ba kay Kris when it comes to TV hosting?

“Bukod sa talent niya, e, marami pa siyang kilala at connection sa endorsements. Kris Aquino is Kris Aquino po. A bratinella is always a bratinella.

“Iyon na po talaga ang core niya. Ang naturalesa niya. Sayang lang talaga, makababalik na sana siya after almost four years of absence, pero nagka-falling out pa sila ng producer niya.

“A great talent without the right attitude is useless,” konklusyon ni SOS. Maraming salamat sa opinyon.

Pero sa impormasyong nakarating sa amin ay ibang producer na ang maghahatid sa publiko ng magazine show ni Korina Sanchez sa TV5. Ang malakas na ugong ay si Congressman Albee Benitez ang mamumuhunan sa bagong show ni Ate Koring na iba-blocktime sa TV5.

So, magkaibang producers ang tinutukoy sa kuwento, pero napakaraming nanghihinayang sa dapat sana’y pagbabalik-TV na ng Queen Of All Media.

Napakatagal siyang hinintay ng kaniyang mga tagahanga, ng mga kababayan nating naaaliw sa sarili niyang atake sa pagho-host, pero nabulilyaso pa.

May nagkomento sa IG account ni Kris na nasa kaniya ang problema at wala sa TV5, sinagot naman iyon ni Kris na oo nga, nasa kaniya ang problema, “Hindi kasi nila ako bet.”

Mayroon pang ganoong komento? Hindi raw siya bet ng network? Ano naman ang kinalaman ng mga tagapamuno ng TV5 sa hindi pagkatuloy ng kaniyang programa samantalang hindi naman iyon station produced?

Ang mismong prodyuser niya ang nakasamaan niya ng loob kaya umurong na, hindi naman ang mga ehekutibo ng network, kaya bakit mayroon pa siyang kataklesang komentong hindi kasi siya bet ng TV5?

Sharon Cuneta – Tumutulong nang tahimik, walang “press release”

Ang dami-dami palang kuwento tungkol kay Sharon Cuneta na hindi lumalabas. Puro magagandang kuwento iyon na hindi nanggagaling sa Megastar kundi mula sa mga taong tinulungan niya nang walang press release.

Si Daddie Wowie Rojas, manager ni Mayor Isko Moreno at marami pang ibang personalidad, ay may hindi makakalimutang karanasan kay Sharon.

“Dancer pa ako ng Blackgold noon, nag-rehearse kami sa show ni Sharon, nawala ang wallet ko, kaya ako na lang ang naiiwang dancer sa studio. Tinanong niya ako kung bakit.

“Sinabi ko sa kaniya na nawala ang wallet ko, hindi ako makauwi, wala kasi akong pamasahe. Agad-agad, inabutan niya ako ng pera, three hundred pesos!

“Malaking halaga noon ang three hundred, magtatagal sa bulsa mo ang amount na iyon! Saka hindi naman lahat ng mga artista, e, tulad ni Sharon na tutulong sa iyo,” pag-alala ni Daddie Wowie Rojas.

May kuwento rin tungkol sa isang kilalang personalidad na pumanaw na hindi mailabas-labas sa ICU dahil walang pera ang pamilya nito. Ang Megastar din ang nagpadala nang milyon bilang pagtanaw ng utang na loob sa pumanaw.

Isang composer ang pumanaw na wala sa bansa ang Megastar, pero sa kabila noon, may pinag-asikaso siyang staff para ayusin ang lamay at libing ng composer. Siya ang sumagot sa lahat-lahat ng gastusin, mula sa puso ang kaniyang pagtulong, hindi na iyon malilimutan pa magpakailanman ng pamilya ni Mr. Willy Cruz.

Ang dami-dami pang kuwento ng pagmamagandang-loob sa kaniyang kapuwa ng Megastar ang nakarating sa amin. Wala siyang pinipiling estado sa buhay, basta nalaman niya ang sitwasyon ay agad siyang tumutulong, hindi niya iyon ipinagmamakaingay.

Tama ang mga linya sa isa niyang piyesa na anuman ang maganap sa kaniyang buhay ay itatayo siya ng panahon. Hindi siya nawawala sa gitna ng aksiyon.

Jim Paredes – Umariba na naman ang sawsawerong laos

Umariba na naman ang sawsawerong laos na si Jim Paredes. Pansamantalang tumigil ang pag-iingay ng singer na ito pagkatapos pandirihan ng publiko ang kaniyang sex video.

Pero buhay na naman siya sa pagpapalaganap ng kaniyang kasarkastikuhan at pagbibigay ng mga opinyong kinokontra naman ng mga netizens.

Dilawan si Jim Paredes, inaaway niya ang mga pulitkong kaalyado ni PRRD, inuupakan din niya ang mga DDS. At dahil kadalasan ay nagiging kritiko ng mga Dilawan ang magaling na broadcaster na si Ted Failon ay tinawag niyang “spreader of fake news” ang walang inuurungang news anchor.

Ayun, dahil sa kaniyang pahayag ay umani si Jim Paredes ng bashing, binalikan ng mga kababayan natin ang kahalayang ginawa niya habang nilalaru-laro ang kaniyang sariling ari.

Mema lang. Makakontra lang. May maiopinyon lang. Anong fake news naman kaya ang ibinibintang ng singer na ito kay Ted Failon?

Sino kaya ang panay-panay ang paglalabas ng mga kuwentong puro kababalaghan lang naman? Sino ba ang madalas mabuking ng bayan na nag-iimbento ng mga senaryong puro kathang-isip lang naman.

Siya iyon. Si Jim Paredes iyon at hindi si Ted Failon. Hindi na nahiya ang huklubang singer na ito sa pambabato ng mga bintang na kapos naman sa ebidensiya at malayo sa katotohanan.

Pagkatapos kumalat ang kaniyang sex video na pinagpistahan ng buong bayan habang napapa-yuck ay heto na naman si Jim Paredes, nanggugulo na naman, kung anu-anong paghusga na naman ang pinalulutang niya laban sa mga broadcaster at personalidad na sa kaniyang isip ay hindi nila kakampi.

Ano kaya ang nararamdaman ngayon ng kaniyang mga kasamahang sina Danny Javier at Buboy Garovillo sa mga pinaggagagawa ni Jim Paredes?

Nakakahiya! – CSF