Published on

Cristy Per Minute ni Cristy FerminAgosto 16-31, 2020

  KC Concepcion
 
KC Concepcion
      Matteo Guidicelli Sarah Geronimo
Matteo Guidicelli & Sarah Geronimo
  Kris Aquino
 
Kris Aquino
  Anjo Yllana Alden Richards
 
Anjo Yllana & Alden Richards
  Ethel Booba
 
Ethel Booba
  Gabby & KC, Mom Lourdes Concepcion
 
Gabby & KC, Mom Lourdes Concepcion

KC Concepcion – “I am not perfect…”

Pinaglaanan talaga namin ng oras ang unang sultada ng Usapang Real Life ng hepe ng News 5 na si Ms. Luchi Cruz Valdes.

Nasa Probe Team pa lang ang news anchor ay inagaw niya na ang aming atensiyon. Malinaw siyang magtawid ng mga impormasyon at itatago mo sa iyong puso ang kaniyang mga dokumentaryo.

Ang Usapang Real Life ay isang klase ng programang uumpisahan mo at tatapusin mo. Hindi mo iiwanan ang panonood kahit pa nagrereklamo na ang pantog mo para dyuminggel ka.

Turn the table ang unang segment, si Luchi ang kinapanayam ng kaniyang kasamahan at kaibigang si Karen Davila, nakasalampak lang sila nang napakakaswal sa isang puting sofa.

Binuklat ni Luchi ang libro ng kaniyang tunay na buhay sa publiko. Mula sa kaniyang pagkabata hanggang sa magtrabaho na siya bilang reporter. Mula sa pagpanaw ng kaniyang mister na si Kuya Lito hanggang sa siya na mismo ang tatlong buwang nagkasakit at namalagi sa ICU.

Siya ang unang nagbukas ng tunay niyang buhay sa manonood. May karapatan na siyang buklatin ang tunay na buhay ng kaniyang mga panauhin.

Masustansiya ang kaniyang panayam kay KC Concepcion bilang buwena-mano sa kaniyang programa. Maraming impormasyong tumawid sa publiko tulad ng pananahimik lang ng dalaga nina Sharon Cuneta at Gabby Concepcion pero napakarami palang natutulungang mga kababayan natin.

Lumuha si KC sa puntong ang pagiging anak niya na ang naging paksa. May kani-kaniyang pamilya na ang kaniyang mga magulang, mayroon siyang mga kapatid sa ama at ina, pero hindi niya naman kasama.

Ang konsepto ng isang pamilya para kay KC ay buo, isang katotohanang wala siya, iyon ang kulang sa kaniya na hanggang ngayo’y hinahanap pa rin niya.

Pero gusto niyang ipagmalaki siya ng kaniyang mga magulang sa kaniyang pag-iisa, lalo na ni Sharon, na aminado si KC na number one fan siya.

Naging napakahirap para kay KC ang ilang buwan na lockdown na mag-isa lang siya sa kaniyang condo. Ginamit niya ang panahon sa pagluluto sa tulong ng kaniyang mga kaibigan.

Ikinuwento rin ni KC ang madalas niyang pagyakap sa isang puno ng mangga, kapag nag-wish ka raw kasi ay matutupad iyon, gusto na niyang magkaroon ng anak.

Marami pang ikinuwento ang dalaga pero sa pagtatapos ng panayam ay sinabi niya, “I am not perfect, but I’m willing to learn.”

Aabangan uli namin sa susunod na Sabado nang gabi sa TV5 ang Usapang Real Life ni Ms. Luchi Cruz Valdes.

Kapag masarap na sa una ang natikman mo ay siguradong mas masarap ang mga susunod pa.

Sarah Geronimo – Laging may trabaho, bukas ang pintuan ng GMA-7 at TV5

Problemado talaga ngayon ang mga artista ng ABS-CBN. Walang katiyakan ang kanilang trabaho, iilan lang sa kanila ang nabibigyan ng proyekto, isang maliit na piraso lang ng karne kumbaga ang kanilang pinaghahati-hatian.

May trabaho man sila ay hindi na tulad nang dati ang kanilang talent fee, halos kalahati ang kaltas, na intindido naman ng mga artista dahil sa pagpapasarado sa kanilang network.

Maganda ang posisyon ni Sarah Geronimo, bukas ang pintuan ng GMA-7 at TV5 para sa singer-actress, depende na lang kay Boss Vic del Rosario kung saang network siya ibibigay.

Saang istasyon man magtrabaho si Sarah ay malaking kadagdagan siya, malawak at aktibo ang kaniyang Popsters, matindi na rin ang napatunayan niya sa takilya.

Walang katalu-talo si Sarah, nakakatulog siya nang mahimbing habang kayakap si Matteo Guidicelli, may kapayapaan siya ng kalooban dahil alam niyang mayroon siyang maaasahan at pupuntahan.

Kapag nagkukuwentuhan nga raw sa phone ang mga artista ng ABS-CBN na walang trabaho ay hindi nila maiwasan ang magkaiyakan. Marami silang iniintindi.

May mga kumuha ng hulugang sasakyan dahil may buwanan naman silang kinikita sa network, puwede na nga namang ipangutang iyon, may naglakas-loob ding kumuha ng house and lot.

Pero sino nga ba ang mag-aakalang sa isang iglap ay ganito na ang sitwasyon ng ABS-CBN, wala man tayong nakikitang mga padlock ay ipinasarado ang network, matindi ang epekto siyempre noon sa kanilang mga nasasakupan.

Sino ang dadalawin ng antok kapag ganoon ang sitwasyon? Lumolobo ang bills ng mga artista at empleyado na kailangang bayaran pero wala na silang buslong pagkukunan?

Lantad ang emosyon ni Gerald Anderson, wala na itong trabaho ay sarado pa ang kaniyang negosyong gym na malaki ang naitutulong sa kaniya, nangangapa rin sa dilim ngayon ang aktor.

Suwerte ang mga nakapag-ipon, may nadudukot pa sila ngayon kahit walang pumapasok sa kanilang kaban, madilim naman ang mundo ngayon ng mga personalidad na hindi nakapaghanda para sa kanilang kinabukasan.

Kris Aquino – Sana’y siya na lang magprodyus ng sarili niyang programa

Tahimik ang mundo ngayon ni Kris Aquino. Walang anumang pahayag na nanggagaling mula sa kaniya tungkol sa pagkaudlot ng kaniyang pagbabalik-TV pagkatapos nang halos apat na taon.

Ayon sa isang source ay may dalawang dahilan para manahimik si Kris. Una ay wala siyang dapat ipaliwanag, maayos ang lahat, kaya bakit siya magsasalita?

Ang ikalawa ay totoong may problema, ayaw lang niyang magbigay ng komento, dahil lalo pang makagulo. Kaya habang nagpipista ang lahat ay tahimik lang si Kris. NR siya.

Suhestiyon ng marami, tutal naman ay idolo niya si Oprah Winfrey na may sariling network, ay bakit kasi hindi na lang siya ang magprodyus ng sarili niyang programa?

Kapag kaniya ang network ay masusunod ang lahat ng gusto niya, wala siyang kailangang kausapin, siya na mismo ang magdedesisyon. Wala siyang makakaaway na prodyuser, wala siyang makakasamaan ng loob, dahil siya ang reyna ng network.

At kayang-kaya niya namang isakatuparan iyon dahil kayang-kaya niyang mamuhunan, kaya niyang kumuha ng magagaling na production people na makakasama niya, malaya pa siyang makapagdedesisyon.

May mga nagkokomento na baka raw may kasamang mabibigat na tao sa kaniyang paligid ngayon si Kris. Tinatalo raw ng negative vibes ang kaniyang mga plano.

Nakakahiya naman iyon sa mga taong tumutulong ngayon kay Kris para sa kaniyang pagbabalik. Ginagawa naman nila ang lahat para ipaglaban ang kaniyang programa na noong una’y tinanggihan na nga ng TV5 pero napagtagumpayan nilang makakuha ng airtime.

Sayang na sayang na oportunidad, nakaabang na ang mga kababayan natin sa dapat ay paglulunsad ng kaniyang programa sa August 15, pero nabulilyaso pa.

Tuwang-tuwa na sana ang kaniyang mga tagasuporta, pagkatapos nga naman nang halos apat na taon ay mapapanood na uli ang Queen Of All Media, pero biglang may naganap.

Nakaplantilya na ang show, kasado na, pero nagkaroon pa rin ng problema. Totoong-totoo na habang hindi pa gumigiling ang mga camera at literal na nating napapanood ang proyekto ay wala pa ring kasiguruhan ang mga plano.

Alden Richards – Masuwerte. Hindi nawalan ng trabaho ang Pambansang Bae

Napakasuwerte talaga ni Alden Richards. Sa isang panahon na nawalan ng exposure ang napakaraming artistang nawalan ng trabaho ay isang buong linggo namang napapanood ang Pambansang Bae.

Mula Lunes hanggang Sabado ay nasa Eat…Bulaga siya, may musical variety show siya tuwing Linggo, ipalalabas pa uli mula bukas ang seryeng pinagbibidahan nila ni Louise delos Reyes kung saan nag-ugat ang tawag sa kaniyang Tisoy.

Isa si Alden sa mga artistang nakakatulog nang mahimbing, may kapayapaan ng kalooban, dahil hindi siya napabilang sa mga personalidad na walang trabaho.

Siya na ang sumusuko sa marami pa sanang plano para sa kaniya ng GMA-7, alagang-alaga siya ng network, idagdag pa ang mga bagong TVC na ginawa niya na ipinalalabas na ngayon.

Wala nang mahihiling pa si Alden, puro pasasalamat sa Diyos na lang ang ginagawa niya, dahil kahit sa panahon ng pandemya ay hindi siya problemado dahil nakapag-ipon siya.

Napaghandaan niya na ang kinabukasan ng kaniyang pamilya, may nakatabi na siyang magagamit sa panahon ng indulto, mayroon din siyang nakalaang halaga para sa pagtulong niya sa mga nangangailangan.

At tama ang obserbasyon ng kaibigan naming propesor, sabi nito, “Si Alden ang barometro ng kaguwapuhan ngayon. Dati, si Piolo Pascual iyon. Dati, kapag sinasabing guwapo, si Piolo ang comparison.

“Pero ngayon, e, si Alden na. Kapag sinasabing guwapo ang isang guy, ang sasabihin agad, e, mala-Alden Richards ang itsura.

“Mabait kasi si Alden, kaya palagi siyang binibiyayaan. Kahit sa malayuan, kahit hindi mo pa siya kilala nang personal, alam mong mabait talaga siya,” papuri ni prop sa Pambansang Bae.

Anjo Yllana – Matapos ang dalawang dekada, nagpaalam na sa Eat…Bulaga

Magiging masakit talaga para kay Anjo Yllana ang pagpapaalam sa Eat…Bulaga. Dalawang dekada siyang naging bahagi ng pinakamatagal na noontime show sa balat ng Pilipinas, araw-araw iyon, Linggo lang sila hindi nagkikita-kita ng kaniyang mga kasama.

Napakalalim na ng kanilang samahan, sa noontime show na siya nagbinata, nag-asawa at naging pulitiko.

Nagbitiw na sa programa si Anjo Yllana, ang tanging sinabi niya ay mabigat na desisyon ang kaniyang ginawa, pero wala naman siyang nabanggit na dahilan kung bakit.

Noong una ay kasama si Anjo sa main studio, marami silang nagho-host, pinakabida siyempre ang Tito, Vic and Joey.

Pero nitong mga huling panahon ay nasa labas na siya ng studio, inilipat siya sa Sugod-Bahay segment, na ang lutang na lutang naman ay sina Jose Manalo, Wally Bayola at Paolo Balleteros (Jowapao).

Naramdaman kaya ng aktor-pulitiko na paliit na nang paliit ang kaniyang mundo sa noontime show? Dati’y malaki ang kaniyang partisipasyon, hanggang sa isang segment na lang ang kaniyang ginagawa, iyon kaya ang dahilan ng kaniyang pagbibitiw?

Para sa ibang kababayan natin ay hindi masamang bumitiw lalo na kung hindi na siya masaya. Lalo na ngayon, walang Sugod-Bahay ang pangtanghaling programa, nasa studio lang ang mga hosts at magkakalayo pa.

Pero nang lumutang ang balitang may gagawin pala silang programa ni Kitkat na katapat pa ng Eat…Bulaga ay nagbago ang timplada ng reaksiyon ng ating mga kababayan.

Sana raw ay nagpalipas muna nang mahaba-habang panahon si Anjo bago siya nagdesisyong tumanggap ng programang katapat pa mismo ng show na kaniyang pinanggalingan.

Respeto at delicadeza ang tawag doon. Punto naman ng kaibigan naming propesor, “Sinumang hindi kalabisan ay hindi kawalan.”

Willie Revillame – Nagbigay na ng 5M pesos tulong sa mga jeepney drivers, napintasan pa

Napakahirap ng sitwasyon ng mga personalidad na tumutulong sa mga kababayan nating nasa gitna ng pagdarahop ngayon. Tumutulong na nga sila ay pinipintasan pa at kinukuwestiyon.

Hindi biro ang limang milyong pisong tulong na ibinigay ni Willie Revillame sa mga kababayan nating jeepney drivers na dahil hindi makapamasada ay napilitan nang mamalimos sa kalye para may maipakain sa kani-kanilang pamilya.

Pero may mga namintas pa sa aktor-TV host, bakit pa raw siya nagpa-interview kay Presidential Spokesman Harry Roque, bakit daw hindi na lang siya ang direktang namahagi ng tulong sa mga jeepney drivers?

May maipintas lang, may masabi lang, may maipanira lang. Unang-una ay hindi naman alam ni Willie ang mga samahan ng mga jeepney drivers. Napakalaking trabaho para sa kaniya ang alamin kung anu-anong organisasyon ng mga motorista ang kinasasaniban nila kaya ang pinakamagandang puwedeng gawin ay ipadaan sa DSWD ang kaniyang donasyon.

Kung si Willie mismo ang magsasadya sa lugar kung saan may mga namamalimos na jeepney drivers ay ano ang kahihinatnan noon? Magkakagulo, nakakatakot ang magiging scenario, sa halip na mapabuti ang kaniyang intensiyon ay baka mabaligtad pa kapag nagkaroon ng pagsasakitan sa hanay ng mga nagmamaneho ng pampublikong sasakyan.

Kapag tumutulong ang tao nang bukal sa puso ay huwag na sana nating kinukuwestiyon pa ang intensiyon. Hindi siya nagpa-interview para magyabang, kinailangan lang niyang padaanin kay Attorney Harry Roque ang tulong, para maiendorso naman iyon sa DSWD.

May suntok sa puso ang pahayag ni Willie Revillame sa Tutok To Win; ang sinsero niyang sabi, “Alam ko po kung ano ang pinagdadaanan n’yo. Ramdam na ramdam ko po kayo.

“Nagtrabaho rin po akong barker noon sa Caloocan. Naglinis din ako ng mga jeep na kabibiyahe lang na barya-barya lang ang tinatanggap ko.

“Alam na alam ko po ang buhay na pinagdadaanan n’yo ngayon. Napakahirap,” pagbabalik-alaala ni Willie Revillame sa payak niyang nakaraan.

At hindi lang naman ngayon ginawa ng TV host ang pagtulong, noong salantahin ng Yolanda ang mga kababayan natin sa Leyte at mga katabing probinsiya ay nagbigay rin siya ng donasyong sampung milyong piso, walang halong kulay ng pulitika ang pagbubukas ng kaniyang puso sa maliliit nating kababayan.

Kahit sino pa ang pangulong nakaupo, tutulong at tutulong pa rin si Willie Revillame, dahil iyon ang ibinubulong ng kaniyang puso.

Hindi lahat ng taong may sobra-sobrang tinatanggap na biyaya ay magkakaroon ng puso para ibahagi iyon sa mga walang-wala lalo na sa panahon ngayon ng pandemya.

Ethel Booba – Na-bash dahil ginawang biro ang matinding isyu ng suicide

Sa panahong ito ng pandemya ay ipinapayo ng mga doktor na huwag tayong magpapa-stress. Kung wala pang natutuklasang bakuna para sa COVID-19 ay wala pa ring gamot na makapagpapagaling sa stress na kadalasan ay nauuwi sa depresyon.

Palaging sinasabi ng mga psychiatrist na ang happy hormones ay mabisang pananggalang sa kalungkutan at seryosohang pag-aalala, kailangan chillax lang tayo sa kabila ng pandemya, makatutulong iyon sa matinding pinagdadaanan ng buong mundo ngayon.

Pag-asa ang kailangan ng buong bayan ngayon. Na isang araw ay matatagpusan din natin ang paghamon ng corona virus. Hindi tayo dapat bumibitiw sa pananampalataya at pag-asa na gigising na lang tayo isang umaga na may tuldok na ang ating paghihirap.

Pero may isang luka-lukang personalidad na buong-ningning na nag-post na kung nai-stress na tayo ay mayroon siyang ibinebentang lubid na mura lang ang halaga.

Ginawang biro ni Ethel Booba ang matinding isyu ng pagsu-suicide o pagpapakamatay. Sa isang iglap lang ay inupakan sa social media ang komedyanang hindi muna nag-iisip bago mag-click na nakangiti pa.

Sa inis sa kaniya ng mga kababayan nating tagapagpalaganap ng pag-asa ay hinamon siya, “Kung sino ang nag-isip na tama ‘yan, siya ang mauna!”

Nakakalungkot nga naman na may mga tulad ni Ethel Booba na sa halip na magbigay ng lakas ng loob sa social media ay nagtuturo pa ng maling proseso para tapusin ang depresyon, ang pagpapakamatay, na maling-mali.

Pero anong respeto ba ang maaasahan natin sa isang tulad ni Ethel Booba na minsan ay ipinagbuyangyangan sa publiko ang pinakakatagu-tagong hiyas ng babae?

Malinaw, naka-close-up pa, na ipinakita ng bastos na komedyanang ito ang kaniyang ari na parang wala lang. Sarili nga niya ay hindi nirerespeto ni Ethel Booba, sino pa ang kaya niyang respetuhin, mayroon ba?

Seryosong usapin ang depresyon. Lalo na ang suicide. Binubura iyon sa ating isip. Hindi pagtatali ng lubid sa leeg na mura lang ang solusyon sa problema.

Kasalanan iyon sa Diyos. Kung sino ang nagbigay ay siya lang ang may karapatang bumawi sa ating buhay.

Gabby Concepcion – Malungkot. Pumanaw ang ina na may problema pa silang dalawa

Dobleng kalungkutan ang nararamdaman ni Gabby Concepcion sa pagpanaw ng kaniyang ina. Literal na nakalulungkot ang mawalan ng magulang. Sugat iyon na walang paggaling.

Pero masakit ang katotohanan na pumanaw si Mommy Baby na may problema sila ni Gabby. Nagkasuhan sila dahil sa isang property sa San Juan na ayon sa mga kapatid ng aktor ay sinolo niya.

Sa mga lumabas na balita, na umabot na nga sa husgado, ay pineke ni Gabby ang pirma ng kaniyang ina para maibenta niya ang propyedad. Mismong mga kapatid niya ang nagpapatunay na walang alam ang kanilang ina sa bentahan.

Harinawang bago nawala si Mommy Baby ay naiayos na ng pamilya ang problema. Sa kasabihang Pinoy, kapag pumanaw ang magulang na may matinding sama ng loob sa anak, ay hindi magiging maganda ang takbo ng kaniyang buhay.

Sana naman. –CSF