Agosto 1-15, 2022

	Arjo Atayde & Maine Mendoza
	Ivana Alawi
	Andre Brillantes
	Heart Evangelista
	Alex Gonzaga
	Aljur Abrenica & AJ Raval
	Jane De Leon
	Sharon Cuneta & Rowell Santiago
	Vice Ganda / Bayani Agbayani
	Kris Aquino
	Lydia De Vega

Maine Mendoza at Arjo Atayde – Engaged na!

Sa altar hahantong ang tatlong taon nang relasyon nina Congressman Arjo Atayde at Maine Mendoza. May kompromiso na sila sa isa’ isa. Kung kailan magaganap ang kasalan ay wala pang eksaktong petsa at kung saan.

Ang mahalaga ay nakatali na ang kanilang mga puso sa isang pangako na manunumpa sila sa harap ng Diyos at ng mga tao na mamahalin nila ang isa’t isa habambuhay.

Matindi ang pinagdaanan ng relasyon nina Arjo at Maine. Matitindi ang mga paghusgang ipinakain sa kanila ng mga hanggang ngayo’y naniniwala na si Maine ay para lamang kay Alden Richards.

Pinagdudahan ang pagmamahal ni Arjo, sinaktan pati ang kaniyang buong pamilya, pinagbintangan ang mga Atayde na kayamanan lang ni Maine ang habol ng aktor.

Para namang mula sa pamilyang naghihikahos si Arjo na salapi lang ang hangad kay Maine. Pigil na pigil ang kaniyang ina, napakatapang ni Sylvia Sanchez pero ayaw nitong manghimasok sa relasyon ng kaniyang anak, kaya tiniis lang nilang mag-anak ang lahat.

Pero ang tunay na pagmamahalan ay walang inuurungan, kinalaban nina Arjo at Maine ang mundo, pero hindi sila bumitiw sa isa’t isa.

Ganoon ang tunay na pagmamahalan, kayang kalabanin ang kahit ano at kahit sino, maging ang buong mundo. Ang mahalaga ay ang pagmamahal nila at respeto sa bawat isa, ang pagtupad sa kanilang mga pangarap, ang pagbubuo ng pamilya.

Maligayang bati kina Congressman Arjo at Maine, minsan pa nilang pinatunayan na sa larangan ng pag-iibigan, harangan man sila ng sibat ay mananatiling tapat.

Ivana Malawi – Malapit sa puso ng ating mga kababayan

Lalong naging malinaw sa amin kung bakit malapit ang puso ng ating mga kababayan sa napakaseksing si Ivana Alawi. Sa kabila ng kaniyang estado sa buhay bilang tagapagmana ng kaniyang amang banyaga ay milyones ang kinikita niya sa pagba-vlog.

Pero sa kabila noon ay hindi siya nagbabago, parang balewala lang kay Ivana ang mga nagaganap sa kaniyang buhay, gagawin niya ang gusto niya kung saan siya masaya.

Nagbakasyon silang mag-iina sa Spain. Kumpleto sila. Si Ivana ang sumagot sa lahat ng gastos na kayang-kaya niya naman dahil buwan-buwan ay milyones ang kinikita niya sa pagba-blog.

Masang-masa ang sexy star, hindi siya kumakain sa mga lugar na sosyal, sa palengke sila kumakain ng kaniyang ina at mga kapatid.

“Ewan ko ba, pero mas nasasarapan akong kumain sa mga ganitong lugar. Sarap na sarap ako sa mga food na masang-masa talaga,” sabi ni Ivana.

Makikita rin siyang kumakain ng mga street food, maraming Pinoy na nakakakilala sa kaniya at nagpapa-picture, may mga nagtataka nga kung bakit hindi sila kumakain sa mga kilalang restaurant sa Barcelona.

Naisip namin, iyon ang lubid na nagtatali kay Ivana Alawi sa ating mga kababayan, hindi siya humihiwalay sa masa samantalang kayang-kaya niya namang gawin iyon dahil milyonarya na siya.

“Masayang-masaya ako dahil kumpleto kami, kasama namin si mama, sa ibang biyahe kasi, e, hindi naman siya nakakasama,” sabi pa ni Ivana Alawi.

Andrea Brillantes – Lumaki sa iskuwater

Marami kaming tinatanggap na mensahe ng pasasalamat mula sa kampo ni Andrea Brillantes dahil sa pagkukuwento namin tungkol sa kaniyang pinagmulan sa Cristy Ferminute at Showbiz, Now Na!

Salamat daw, dahil sa pagtalakay namin sa nakaraang buhay ni Blythe ay gumanda ang kaniyang imahe, nabalanse raw noon ang dating pagkabuwisit sa kaniya ng ating mga kababayan noong panahon ng kampa niya at eleksiyon.

Tanggapin natin ang katotohanan na nagpakalalim sa usaping-pulitika si Andrea noong nakaraang halalan bilang Kakampink. Milyon ang nagalit sa kaniya dahil nagmalabis din naman kasi siya noon sa pagpo-post ng kaniyang mga komento.

Negang-nega ang kaniyang dating, talagang bina-bash siya nang todo, iyon ang kaniyang kinakain sa agahan, tanghalian at hapunan. Lahat ng kaniyang kilos ay sinusundan ng mga bashers niya, hindi siya nakaliligtas, pinagpistahan siya sa negatibong paraan.

Pero sabi nga, kapag hindi natin maintindihan ang isang tao ay kailangan nating balikan ang kaniyang nakaraang buhay, mula doon ay makakakita tayo ng mga dahilan para unawain natin siya.

Sa panayan sa kaniya ni Karen Davila na binigyan namin nang mas mahabang pagtutok sa Showbiz, Now Na! ay nalantad ang kaniyang pinagdaanang buhay.

Lumaki si Andrea sa iskuwater sa pagkandili ng kaniyang lolo at lola,. Mahirap ang kanilang pamilya kaya batambata pa lang siya ay kung saan-saan siya nakararating para mag-audition.

Sa dami ng kaniyang audition ay natanggap naman siya, ipinanganak ang isang child actress, malaking-malaking tulong sa pamilya nila ang hindi naman kalakihan niyang kinikita.

Hanggang sa nakilala siya nang husto sa seryeng Kadenang Ginto, nagkaroon na rin siya ng mga endorsement at mga shows sa probinsiya, iyon ang inipon niya para matupad ang kaniyang pangarap na magkaroon ng sariling bahay ang kaniyang pamilya.

“Wala po kaming sariling bahay, palipat-lipat lang po kami, kaya sabi ko, kapag nakaipon na ako, bahay ang unang-una kong ipupundar para sa family ko,” pag-alala pa ni Andrea.

Malaking rebelasyon din ang kawalan niya ng panlasa at pang-amoy, meron siyang disorder, ang tawag doon ay anosmia. Inututan na siya ng kaniyang kapatid sa mismong tapat ng ilong niya pero wala siyang naamoy na mabaho.

Hindi rin niya alam ang lasa ng masarap na pagkain, pati ang panis, wala siyang pagkukumpara na maaaring sabihin sa kawalan niya ng panlasa.

Maayos na ang kaniyang buhay ngayon, nabibigyan na niya ng katuparan ang mga pangarap niya sa kaniyang pamilya, masayang-masaya na siya ngayon.

Heart Evangelista – Mabait at very approachable

Hindi namin nasusundan ang mga aktibidad ni Heart Evangelista. Ang alam lang namin ay isa siya sa mga de-primerang personalidad na nabiyayaan ng lahat ng mga gusto niya sa buhay dahil ipinanganak siyang mayaman.

Pero maraming kababayan nating dekada nang naninirahan sa iba-ibang bansa ang nagkukuwento sa amin kung gaano kadaling pakiusapan ang aktres para sa pakikipag-selfie.

Kuwento ng sorority sister naming si Vangie Caperal Aleemi na nagkaroon ng pagkakataong makita si Heart sa New York, “She’s so approachable, hindi siya nagdalawang-isip noong mag-request kami ng picture with her. She was smiling all the time at talagang pinagbibigyan niya ang mga Pinoy na nagpapa-picture sa kaniya.

“Akala nga namin, e, suplada siya dahil sosyal na sosyal ang dating niya, di ba? But no, mabait siya, samantalang nagsi-shopping siya that time, ha?

“Bago siya umalis, tinanong pa niya ang iba naming kasamahan kung okey na kami, very approachable pala si Heart, mahal na namin siya!” kuwento sa amin ni Bangge.

Napakagandang anekdota. Kakalat nang kakalat iyon, pagkukuwentuhan ng mga kababayan antin, na mas magpapaganda pa sa imahe ng magandang si Heart Evangelista.

Alex Gonzaga – Nagbitiw na sa LOL

Nagbitiw na pala sa Lunch Out Loud si Alex Gonzaga, apat na dahilan ang ibinigay ng kaniyang kampo kung bakit. Ang kaniyang inang si Mommy Pinty ang naglatag ng mga dahilan ng pag-alis niya sa programa.

Una, ang LOL daw ay isang lunch time show nang tanggapin niya, pero ngayon ay pre-programming na lang ng It’s Showtime.

Ikalawa, dati raw ay dalawang oras ang LOL pero ngayon ay isang oras at kuwarenta’y singko minutos na lang, binawasan na.

Ikatlo, dahil ang ABS-CBN daw ang magpapatakbo ng It’s Showtime ay natural lang na mas paboran ang pangtanghaling programa, kumpara sa LOL na blocktime lang ng Brightlight Production sa TV5.

At ikaapat, gustung-gusto na raw magkaanak ni Alex at ng kaniyang mister na konsehal, pinayuhan daw siya ng kaniyang doktor na magbawas ng trabaho at maghinay-hinay.

Natural, sa kaniyang pagbabawas ng work load ay hindi pipiliing itigil ni Alex ang kaniyang vlog, milyon ang kinikita niya sa YouTube, samantalang sa LOL ay barya-barya lang ng kaniyang kinikita sa vlogging ang tinatanggap niyang talent fee, solong-solo pa niya ang panahon at wala siyang boss.

Pero sabi nga ng produksiyon ay hindi naman si Alex lang ang pinanonood sa programa, tatayo ang LOL kahit wala siya, kaya tuloy ang ligaya.

AJ Raval – Nagdadalantao, Aljur Abrenica itinuturong ama?

Sa pinakahuling sultada ng Showbiz, Now Na! ay kinumpirma naming nagdadalantao nga si AJ Raval. Walang ibang lalaking isinasangkot sa kaniyang pagdadalantao kundi si Aljur Abrenica.

Hindi pa sila umaamin sa kanilang relasyon, papunta na raw doon sa inaasahan ng marami ang pagiging close nila, pero wala pa silang binibitiwang pahayag na sila na nga.

Pero isang source na hindi nanununog at nangunguryente ang nagbulong sa amin ng katotohanan na nagdadalantao na nga ang baguhang sexy star.

Ilang proyekto pala ni AJ Raval ang iginarahe muna dahil sa kaniyang pagbubuntis. Maraming nanghihinayang, pataas na raw sana ang takbo ng karera nito, pero nagkaroon pa ng pagpreno.

Puwedeng isipin na kaya wala pa silang inaamin ni Aljur ay dahil hindi pa napapawalang-bisa ang kasal ng aktor kay Kylie Padilla. May kaselanan ang sitwasyon.

Paano kung may magbulong at magtulak kay Kylie na kasuhan sina Aljur at AJ, magiging magulo ang senaryo, abangan na lang natin kung ano ang mangyayari.

Kung paninindigan ang pag-uusapan ay hindi nakapagdududa ang pagiging lalaki ni Aljur Abrenica, tatayuan niya ang kasalukuyang sitwasyon ni AJ Raval, may balls ang guwapong aktor.

---

Naghamon ang ina ni AJ Raval. Sa kaniyang post ay sinabi ni Mrs. Alyssa Alvarez, “Mabuhay po tayo nang mapayapa na walang pakialam sa buhay ng iba. Lilinisin ko muna itong FB ko, mukhang bibisitahin na naman ako ng mga Marites!

“Kelangan, maganda ako. Tapos, lilinisin ko na ang mga post ko. Wait nga. Open ko na rin ang Messenger ko para maaway n’yo ako, kasi, baka hindi na naman makatulog ang mga ito.”

Sarkastiko ang mga mensahe ng ina ni AJ Raval. Hindi basta-basta ang mga pinakawalan niyang pahayag, hinahamon ni Aling Alyssa ang mga Marites, lalo na ang mga bashers.

Natural, anak niya si AJ Raval na kung bakit naman kasi mula nang pumasok sa pag-aartista ay hindi na tinatantanan ng mga intriga, ayaw niya siyempreng bina-bash ang kaniyang anak.

Pero dapat ay buhay sa kamalayan ni Aling Alyssa na nag-aartista na ang kaniyang anak, iba na ang buhay ni AJ noong wala pa ito sa showbiz, public figure na ang anak niya ngayon.

Bilang pampublikong pigura ay natural lang na ma-bash si AJ Raval, nakasalang kasi ang sexy star sa mata ng buong bayan, kaya hindi tama ang ginagawang paghahamon ni Aling Alyssa.

Paalisin nila sa showbiz si AJ at magkakaroon na ito ng tahimik na buhay, wala nang manghihimasok sa kaniyang mga pinaggagagawa, hindi tulad ngayon na kung anu-anong kuwento ang lumalabas tungkol sa kaniya.

Sa halip na maghamon ay pangaralan na lang sana ni Aling Alyssa ang kaniyang anak. Payuhan niya ito na magpakatotoo. Huwag masyadong nagbibilad ng kaniyang katawan kaya kadalasan ay nababastos ito.

Naghamon si Aling Alyssa? Ngayon ay malaya na niyang tinatanggap, maging ni AJ, ang resulta ng kaniyang paghahamon. Mapapagod siya sa kasasagot ngayon.

Jane De Leon – Ang bagong Darna

Malapit nang lumipad ang pinakabagong Darna na si Jane de Leon. Kumpirmado na ang kaniyang paglipad dahil magpapaalam na sa himpapawid ang seryeng Ang Probinsyano na pitong nang nakikipagbakbakan sa pamumuno ni Coco Martin.

Pero may mga nagpapa-cancel sa Darna ni Jane de Leon, hindi raw dapat payagang mamayagpag sa paglipad ang Kakampink na bumibida sa palabas, cancel ang sigaw ng kaniyang mga kalaban.

Nakakalungkot lang isipin na ginanap na ang SONA ni Pangulong Ferdinand Marcos, Jr., pero hanggang ngayon pala ay marami pa ring hindi bumibitiw sa mga naganap noong nakaraang kampanya-eleksiyon.

Kalimutan na sana ang mga naganap, uwian na, may nanalo na! Pabayaan na lang sana nilang makalipad ang Darna ng Kakampink na si Jane, tutal naman ay hindi siya kumontra sa desisyon ng taumbayan, nirerespeto naman niya ang pangulo at tinanggap na ang pagkatalo ng kaniyang minanok sa panguluhan.

Tigilan na sana ang canel culture, tutal naman ay iisang lahi lang tayo, hindi naman tayo mga banyaga na nagtatrabaho sa sarili nating bansa.

“Ding, ang bato… Darna!”

Sharon Cuneta at Rowell Santiago – May matinding eksena sa Ang Probinsiyano

Nagdadabog ang ibang Sharonians. Bakit daw kailangan pang ipakita ang eksenang nagtatalik sina Sharon Cuneta at Rowell Santiago sa Ang Probinsyano?

Sana raw ay ginawan na lang ng paraan na hindi masyadong kitang-kita ang dalawa na naghahalikan at magkasamang lumilipad sa alapaap ng kaligayahan.

Nakakahiya raw iyon para sa asawa ni Sharon na si Senador Kiko Pangilinan. May pamilya na raw ang Megastar at siguradong ikahihiya iyon ng kaniyang mister at mga anak.

May karamutan ang ganoong obserbasyon. Sa una pa lang ay alam na ng senador na artista ang kaniyang misis. Hindi maiiwasan ang mga eksenang mainit kapag kailangan iyon sa istorya.

Kailangang gawin ni Sharon ang mga eksenang hinihingi sa papel na ginagampanan niya, pero hanggang sa harap lang naman iyon ng camera, walang personalan.

Totoo, naging magkarelasyon sina Sharon at Rowell nang mahaba-haba ring panahon pero naghiwalay sila bilang magkaibigan, ilang dekada na ang nakararaan at pareho na silang nakahulagpos mula sa nasabing relasyon.

Tapos na iyon, pareho na silang nakapag-move-on, kaya hindi na dapat pang haluan ng kakaibang ideya ang mainit na eksenang pinagsaluhan nila sa magtatapos nang serye.

Ang mas magandang isipin ay propesyonal ang Megastar. Kaya niyang ihiwalay ang kaniyang personal na buhay sa mga tinatanggap niyang papel sa mga proyektong tinatanggap niya.

Ganoon kapropesyonal si Sharon Cuneta.

Vice Ganda – Kinain ang isinuka na niya at napakabalat-sibuyas

Parang nakalibro ang maanghang na salita ng patutsada ni Vice Ganda laban sa kung kani-kanino noong mga nakaraang panahon. Hindi iyon makalimutan ng mga kababayan natin.

Sa mga naglalabasang vlogs, kapag hinihingan ng vlogger ng komento ang tumututok sa kanilang channel, ay nagsasalimbayan ang masasakit na salita patungkol kay Vice Ganda.

Hindi sila nakalilimot, may petsa pa at kung saan naganap ang pagpapatutsada ng sikat na komedyante, kaya wala siyang kalusot-lusot.

Sa pagpapalabas ng It’s Showtime sa TV5 ay muling sumagana ang mga upak kay Vice Ganda, mayroon pang naglalabas ng mga video kung paano niya pinaringgan ang nilipatan nilang network, kasama na ang panayam niya kay Alex Gonzaga sa GGV kung saan napakadiretso niyang sinabi na wala namang nanonood sa TV5 kaya okey lang kung paulit-ulit man ang isinusuot na damit ng komedyana-vlogger.

Ibang magbiro ang tadhana. Parang pusa si Vice ngayon na kailangang kainin uli ang isinuka na niya, dahil sa TV5 na pinalalabas ang pinagrereynahan niyang noontime show.

Tanong ng isang kaibigan namin, wala raw bang nagpapayo kay Vice Ganda na tantanan na ang paninira at panlalait para wala siyang binabawi, wala raw bang pinakikinggan ang komedyante?

Ipinasa namin sa isa ring kaibigan ang tanong, wala nga ba, ito ang kaniyang sagot. “Kahit naman bawalin si Vice Ganda sa kabastusan ng dila niya, e, iyon na talaga siya! Hindi iyon dahil sa sumikat siya, kahit noong wala pa siyang name, bastos na talaga siya!”

Sabi nga, ang kanaturalan ay napipino lang paminsan-minsan, pero hindi na talaga matatanggal.

---

Napakabalat-sibuyas naman ni Vice Ganda! Napakasimple lang naman ng sinabi ni Bayani Agbayani na hindi sila nag-o-overtime sa Lunch Out Loud pero umaray na agad ang bida-bidahan sa It’s Showtime.

Sumagot na agad si Vice sa paraang sarkastiko, totoo raw na hindi maganda ang pag-o-overtime, lalo na sa tulad niya na masyadong makuda sa programa.

Kung sana’y may ginawang pagpaparinig si Bayani, kung sana’y pinersonal siya ng komedyante, pero napakakaswal lang naman ng sinabi nito.

Ano ba naman iyon? Lahat na lang ba ng sabihin ng ibang tao, kahit ng mga kasamahan niyang artista, ay papatulan na ni Vice Ganda?

Sa kaniyang estado ngayon na naabot na niya ang pinapangarap niyang popularidad, dapat ay sinusuklian na niya iyon ng pagpapakumbaba, hindi na siya bumibili ng away.

Si Bayani Agbayani pa? Peacemaker nga ito, marunong makisama at wala kang anumang maririnig na pamimintas sa kaniyang kapwa, si Bayani pa ang kaniyang pinagtripan?

Ipinaglihi talaga sa patola si Vice Ganda!

Eat Bulaga – Di pa rin kayang talunin ng LOL at It’s Showtime

Opinyon ng nakausap namin tungkol sa pagba-back to-back ng Lunch Out Loud at It’s Showtime, “Kahit tatlong shows pa ang pagsunod-sunurin nila, hindi pa rin nila kakayaning talunin ang Eat… Bulaga!”

Mula Aparri hanggang Jolo na raw kasi ang mga tagasuporta ng EB, napakalawak na, hinding-hindi na kayang kabugin ng kahit anong programa pang ipangtatapat sa kanila.

Habang nagkakagulo raw ang dalawang noontime shows ay napaka-relax lang ng mga hosts ng Eat… Bulaga. Parang wala lang, parang normal na normal lang ang kanilang galawan. Parang wala naman silang pinaghahandaan.

Sa nagaganap na labanan ngayon ng mga noontime shows ay isa lang ang nabibiyayaan, ang ating mga kababayan, nasa kanila ang desisyon kung alin ang kanilang tututukan na hindi magsasayang ng pambayad nila sa kuryente.

“Ibang umatake sina Vic Sotto at Joey de Leon, chillax lang sila, parang wala lang, pero rock na rock!” dagdag pa ng aming source.

Maraming bashers ang naging aktibo sa paninita kay Vice Ganda na dati’y napakadulas ng dila sa paninira at pangmamaliit sa TV5 pero ngayon ay nakikisukob na lang siya sa payong ng istasyon.

Sabi ng isang basher, “Para kang pusa ngayon! Kakainin mo uli ang isinuka mo na! Napakayabang mo kasi!”

Kris Aquino – Alam na kung saan nakatira sa Houston, Texas

Napakaliit nga ng mundo. Sa isang hindi sinasadyang pagkakataon ay may natalisod na impormasyon ang kasamahang manunulat na si Morly Alinio na co-host din namin sa Showbiz, Now Na! sa YouTube.

May nagpadala sa kaniya ng resibo ng gamot na inireseta kay Joshua Aquino nang magkaroon ito ng COVID. Dahil malakas ang ibinigay na gamot ay kailangang ilagay ang address ng gagamit, ganoon ang patakaran sa Amerika, mahigpit bago makabili ng gamot.

At hindi pa doon nagkasya ang source ni Morly, hinanap nito sa Google ang eksaktong address ng bahay, isang malaking bahay iyon na puro halaman ang nakapalibot.

Di ba naman? Napakatagal nang hinahanap ng mga kababayan natin sa Houston, Texas kung saang ospital naka-confine si Kris Aquino pero wala silang makuhang impormasyon.

Isang resibo at reseta lang pala ang magiging dahilan para malaman kung nasaan ngayon ang mag-iina. Ayon sa isang impormanteng nakausap namin ay kumuha raw si Kris ng bahay na matitirhan nina Josh at Bimby. Hindi nga naman tama na habang ilang araw na nasa ospital siya ay nandoon din ang magkapatid.

Pero nilinaw ng aming source na hindi pa dire-diretsong nagpapaospital si Kris, papunta-punta lang siya para sa kaniyang mga tests, tinututukan ng mga doktor ang mga laboratory tests niya dahil sa dugo nag-uugat ang kaniyang sakit.

Lydia De Vega – May stage 4 breast cancer

Sobra kaming apektado sa kasalukuyang pakikipaglaban ni Lydia de Vega-Mercado sa stage four breast cancer. Noong nasa high school kami ay nagkaroon kami ng personal na engkuwentro kay Diay.

Atleta kami ng track and field ng Nueva Ecija, siya naman ang pambatong sprinter ng Bulacan, naglalaban kami sa CLAA (Central Luzon Athletic Association).

Milya-milya kaming pinag-iiwanan ni Lydia, napakabilis niyang tumakbo, para lang siyang isang malakas na hangin na dumaan sa harapan mo dahil sa kaniyang bilis.

Hanggang sa naging star player na siya ng Palarong Pambansa. Mula doon ay hinugot siyang pambato ng Pilipinas sa Asian Games. Hanggang sa hinawakan na ni Lydia ang titulong Asia’s Fastest Woman nang maraming taon.

Kinatatakutan si Lydia ng mga atleta ng iba’t ibang bansa, nagtala siya ng record sa 11:20 seconds sa 100 meter dash, ganoon katinding tumakbo ang ating mahal na kababayan.

Ginawa pa ni Diay ang pelikulang Medalyang Ginto, punumpuno ng pag-asa ang proyekto, doon ipinakita ng isang Lydia de Vega na ang kahirapan ay hindi hadlang sa tagumpay.

Napakaganda niyang pagmasdan habang nakatirintas ang mahaba niyang buhok at nakasuot nang maigsing shorts at jersey kung saan nakatatak ang bandila ng Pilipinas.

Ibang-iba na ang itsura ngayon ni Diay. Bukod sa nagkaedad na siya ay sumusuko na ang kaniyang katawan sa matinding pagsasakripisyo sa cancer.

Nangangailangan siya ng panalangin ngayon at malaking tulong na pinansiyal para sa kaniyang gamutan. Hindi niya na kayang tustusan ang malaking halagang kailangan para kahit paano’y madugtungan pa ang kaniyang buhay.

Noong isang araw ay narinig namin na kumilos na agad ang pamunuan ni Pangulong Bongbong Marcos para alamin kung ano ang maitutulong ng ating pamahalaan kay Diay.

Maraming salamat. Ngayon dapat kumilos ang mga taga-gobyerno para ibalik ang pasasalamat sa isang tulad ni Lydia de Vega na nagbigay ng karangalan para sa ating bayan.

Gutom na gutom noon ang Pilipinas sa mga medalya, lalo na sa gintong karangalan, at nagsikap, nagpunyagi at pinagtrabahuhan ni Diay ang mga medalyang ginto na iginawad niya sa ating bayan.

Mga doktor na ang nagsasabi, kapag ang cancer ay kumalat na at umabot na sa sukdulan nang stage four ay bilang na ang kaniyang mga araw sa mundo, kailangan na niyang paghandaan ang pamamaalam.

Mas gusto naming sabihin na may mga nagaganap na milagro sa ating buhay sa iba’t ibang hugis at paraan. Tanging Diyos lamang ang nakakaalam kung hanggang kailan tayo mabubuhay at kung kailangan na nating isuko ang pakikipaglaban.

Ipagdasal po natin ang paghaba pa ng buhay ni Diay. Samahan po natin siya sa pinakahuling takbo ng kaniyang pakikipaglaban, gabayan po natin si Lydia de Vega hanggang sa makaabot siya sa finish line na punumpuno pa rin ng pag-asa, dahil maraming nagmamahal sa kaniya.

---

Pandemya na ay napakarami pa nating ikinalulungkot na pangyayari ngayon. Ang pagkakaroon ng stage four cancer ni Lydia de Vega.

Ang hindi matunton na matinding pagkakasakit ni Kris Aquino. Ang kasalukuyang dinaramdam na sakit ni Pen Medina.

Ang dami-dami pang iba. Sa mga ganitong pagkakataon ay damay ang ating emosyon, nakapagpababa iyon ng tiwala sa ating sarili, dahil bahagi sila ng ating buhay.

Nasa ospital din ngayon si Manay Lolit Solis at nagsimula na siyang sumailalim sa dialysis. Nagkakaedad na siya at natural lang ang pagkakaroon ng mga sakit pero hindi ospital ang kaniyang mundo.

Sama-sama natin silang ipanalangin na sana’y bigyan pa ng akstensiyon ang kanilang pakikipaglaban. Mas maraming dasal, sabi nga natin, ay mas mabilis na nagkakaroon ng positibong resulta. – CFM