Published on

Cristy Per Minute ni Cristy FerminSetyembre 16-30, 2021

    Lolit Solis, Cristy Fermin & Mr. Fu
 
Lolit Solis, Cristy Fermin & Mr. Fu
  Kim Chiu
 
Kim Chiu
  Luis Manzano, Jessy Mendiola & Cong. Vilma Santos
 
Luis Manzano, Jessy Mendiola & Cong. Vilma Santos
  Yen Santos & Paolo Contis
 
Yen Santos & Paolo Contis
  Angel Locsin
 
Angel Locsin
  Noeme Tesorero a.k.a. Mahal
 
Noeme Tesorero a.k.a. Mahal
  Willie Revillame
 
Willie Revillame
  Vice Ganda
 
Vice Ganda
  Nora Aunor
 
Nora Aunor
  Manny Villar
 
Manny Villar

Take It, Per Minute... Me Gano’n – Balik na sa ere

Pagkatapos nang tatlong Martes ay heto na uli para magpasabog ang Take It, Per Minute… Me Gano’n. Nag-text sa amin si Manay Lolit, kapag hindi pa raw pumayag si Salve Asis na mag-show kami ngayong tanghali ay magwawala na siya, matinding pagkaburyong na raw kasi ang inaabot niya sa bahay.

Para sa isang tulad ni Kabsat na sanay na lumalabas ay napakatinding parusa ang pumirmi lang sa bahay. Ang Martes pa naman para sa kaniya ang araw ng kalayaan dahil isinasabay niya na ang iba pa niyang mga lakad pagkatapos ng TIPMMG

Hindi na kami mapapagod sa pagsagot ngayon sa tanong ng mga kababayan natin mula sa iba-ibang bansa, maging dito sa atin, kung kailan babalik ang TIPMMG na itinuturing nilang happy pill ngayong pandemya.

Ang dami-daming pasabog ngayong tanghali. Sa unang pagkakataon ay maririnig natin ang reaksiyon ni Manay Lolit tungkol sa paghihiwalay nina Paolo Contis at LJ Reyes.

Hindi kami naniniwalang wala siyang alam. Bilang manager ni Paolo ay siguradong nagtapat sa kaniya ang aktor kung ano talaga ang naging dahilan ng paghihiwalay nila ni LJ.

Kailangan ding magbigay ng opinyon si Manay Lolit tungkol sa pagbabati nina Lorna Tolentino at Rosanna Roces. Lalambot na rin kaya ang puso niya sa alibugha niyang dating alaga?

At kami naman, inaasahan siyempre ng mga tagasuporta namin ang makasaysayang resbak namin sa mga kuwentong Jinkee Pacquiao, ayon kay Senador Manny ay mukhang mahal lang naman ang isinusuot ni Jinkee pero mura lang. Mamatey?

Siyempre’y inaabangan din ng mga loyalista ng TIPMMG ang mga pasabog na blind item ni Mr. Fu na pinapangalanan ni Many Lolit!

Lahat ng mga isyu ay sasagutin! Lahat ng mga kuwentong lihim ay pasasabugin! Walang iiwanang kontrobersiya ang Take It, Per Minute… Me Gano’n!

Baka nga pati ang sighting ng UFO sa Sorsogon at Bolinao, Pangasinan ay pakialaman na rin namin para lang mapasaya at malibang ang mga kababayan nating OFW na tatlong linggong naghintay sa kanilang paboritong libangan.

Kitakits po tayo sa TIPMMG na napapanood sa pamamagitan ng FB page at You Tube channel ng Pilipino Star NGAYON.

Kim Chiu – May pinagdadaanang problema

Kailangan pang dumaan sa matinding kalungkutan si Kim Chiu para maniwala ang mas nakararami na totoo nga ang relasyon nila ni Xian Lim. Matagal na kasing pinagdududahan ang kanilang relasyon.

Mayroon pa ngang lumabas na kuwento na kapag nandoon ang mga reporters ay napaka-sweet nila, pero kapag nag-alisan na ang mga nag-interbyu sa kanila ay kani-kaniya na sila ng lugar, hindi na nagpapansinan.

Ginagamit lang daw ng binata si Kim, nakikisakay lang daw si Xian sa kasikatan ng dalaga, ganoon daw ang panukat sa kanilang relasyon dati.

Pero ngayong may pinagdadaanang problema si Kim sa kaniyang career ay palaging nakabantay sa kaniyang emosyon si Xian, positibo ang mga payo sa kaniya ng aktor, ramdam na ramdam ng publiko ang kaniyang pagmamahal kay Kim.

Nakakagulat ang mga kuwentong naglulutangan kung bakit inaapuntahan nang matinding depresyon ngayon si Kim. May mga kasamahan daw siya sa It’s Showtime na nanglalaglag sa kaniya.

Tinatanggalan siya ng partisipasyon sa programa, pinagdadamutan siya ng pagkakataong makapagsalita, para ano pa raw at kinuhang isa sa mga hosts sa noontime show si Kim?

Maraming pinasasaya si Kim sa show, hindi kasi siya napipikon kahit pa inisin siya nang inisin ng kaniyang mga kapwa hosts, napaka-game niya.

At sa totoong buhay ay maganda ang puso ni Kim Chiu, nasubaybayan namin ang kaniyang karera mula nang tanghalin siyang kampeon sa PBB, walang masamang tinapay para sa personalidad na ito.

Sana’y malampasan niya ang kalungkutang ito, sana’y huwag magtagumpay ang mga taong nanglalaglag sa kaniya, kung mayroon man.

Luis Manzano at Jessy Mendiola –Maganda ang kumbinasyon

Puring-puri ng mga kaibigan namin si Jessy Mendiola. Ang kanilang pagpansin ay nasasaksihan din namin sa mga vlogs nila ni Luis Manzano na napapanood namin.

Nang sumali na ang Star For All Seasons sa kanilang vlog na napakasayang panoorin ay mas lumulutang ang hindi pagiging mapapel ni Jessy. Simple lang siya, naghihintay ng kaniyang pagkakataong magsalita, hindi siya maingay.

Maganda ang kumbinasyon nila ng kaniyang asawang si Lucky. Kung madaldal ang aktor ay kabaligtaran naman si Jessy. Ito ang pagsasamang magtatagal dahil ramdam na ramdam ang pagrerespetuhan nila sa isa’t isa.

Sabi ng kaibigan namin, “Gustung-gusto ko si Jessy kapag nagba-vlog sila ni Congresswoman Vilma Santos, tahimik lang siya, sa likuran pa nga siya pumupuwesto. Kundi pa siya tanungin ng biyenan niya, e, hindi siya nakikipagsabayan.

“Hindi siya nakikipag-agawan ng papel, naghihintay lang siya, akala ko kasi dati, e, maepal si Jessy,” komento ng aming kausap.

Sa bahay muna nina Senador Ralph at Congresswoman Vilma nakatira sina Luis at Jessy. Sama-sama muna sila ngayong pandemya. Pagba-vlog ang pinagkakaabalahan nila ngayon.

At hindi na nagpapahuli sa balita ang mga kaibigan namin, alam na nila pati ang paboritong pagkain ni Luis, dahil mabubuhay pala ang aktor-TV host kahit tinola ang araw-araw nitong ulam.

“Sinangag at fish naman ang paborito niyang breakfast, hindi pala mapili si Luis sa food, maganda ang ginawang pagdidisiplina sa kaniya ni Vilma,” komento naman ng kaibigan naming matagal nang naninirahan sa UK.

Ganoon katindi ang naaabot ng social media. Iyon ang pinagkakalibangang tutukan ngayon ng mga kababayan nating nalulungkot-nabuburyong na sa ibang bansa.

Paolo Contis at Yen Santos – Isang linggo pala sa Baguio

May mga nagpapatunay na libre nang makipagrelasyon ngayon si Yen Santos. Ilang panahon na pala silang hiwalay ng milyonaryong businessman. May bago nang pag-ibig ang kaniyang ex.

Pinangalanan ng aming impormante kung sino ang milyonaryong businessman. Ang girlfriend nito ngayon ay isang magandang aktres na handa nang lumipad sa gagawin nitong proyekto.

Balitang ang milyonaryong negosyante ang isa sa mga prodyuser ng aktres sa seryeng urong-sulong ang paggawa pero ngayon ay tuluy na tuloy na.

Ginawa nila ang pelikulang A Faraway Land sa napakagandang Faroe Islands. Parang postcard ang matulaing bansa na sakop ng Denmark. Malinis, kakaunti lang ang populasyon, maraming Pinoy na nakakapangasawa ng mga Faroese.

Sa ilang linggong itinakbo ng shooting ay mapang-imbita ang isla sa mga nalulungkot na kaluluwa. Siguro nga ay sa Faroe Islands nagsimula ang pagkakapalagayan ng loob niya Yen Santos at Paolo Contis.

Nagyeyelo ang isla, nilalamig sila, ano pa ba ang unang maiisip ng dalawang taong sawi sa pag-ibig kundi ang magpaalpas ng init ng kanilang katawan?

Kung wala mang nangyari sa kanila sa Faroe Islands ay hindi pa rin naman doon matatapos ang lahat-lahat. Puwede nilang hanapin ang isa’t isa dito sa Pilipinas.

At doon na nga ipinanganak ang pagkikita nila sa Friendship Capital of The Philippines, ang Baguio, kung saan inamin ni Paolo na tinawagan niya si Yen para mayroon siyang makasama-makausap.

Pero hindi lang pala isang araw ang kanilang pinagsaluhan, isang linggo, ayon sa inilabas na mga larawan ng mga tinaguriang Maritess.

Ipinagtanggol ni Paolo si Yen, hindi raw ito ang dahilan ng paghihiwalay nila ni LJ Reyes, dahil bago pa sila nagkasama sa A Faraway Land ay matagal nang nagkakaroon ng problema ang kanilang relasyon.

Tatlong beses na naming pinanonood ang pelikula nina Paolo at Yen sa direksiyon ni Veronica Velasco. May relasyon man o wala ang mga bumibida sa pelikula ay labas na kami.

Paminsan-minsan lang kaming nakakapanood ng pelikulang napakaayos ng pagkakatahi ng istorya, ng isang kuwentong kinunan sa isang lugar na tunay na paraiso ang lokasyon, paulit-ulit pa rin naming panonoorin ang A Faraway Land na pinagbibidahan ng mga sensitibong artistang tulad nina Paolo Contis at Yen Santos.

Angel Locsin – Nag-aalala sa amang COVID-19 positive

Napakatinding suntok sa dibdib ni Angel Locsin ang pagiging positibo sa COVID-19 ng kaniyang amang si Mang Angel Colmenares sa edad na nobenta’y kuwatro.

Nasubaybayan namin ang mga pahayag ni Angel tungkol sa kaniyang ama, kapag magkasama sila ay hindi sapat na naririnig lang ni Mang Angel ang kaniyang boses, hinahaplos-haplos siya sa mukha nito nang paulit-ulit.

Pinanghihinayangan niya ang pagkakataong lumipas na baka maaari pang nakakita ang kaniyang ama pero hindi iyon naganap dahil wala pa silang sapat na naiipon para sa operasyon.

Nang magkaroon na siya ng paraan ay huli na ang lahat, hindi na mapapaoperahan ang kaniyang ama, dahil sa pagkakaedad.

Kayang magpakatapang ni Angel sa maraming giyera sa kaniyang buhay pero kapag pamilya na niya ang sangkot, lalo na ang kaniyang ama, pakiramdam niya ay baldado siya.

Kung kayang mahalin ni Angel Locsin ang mga kababayan nating nagdarahop, kung mayroon siyang bukal na puso sa pagtulong sa mga naaapi at nangangailangan nating kababayan, sampung doble noon ang pagmamahal niya kay Mang Angel.

“Makita ko lang siya, marinig ko lang ang boses niya, mahaplos lang niya ako, matapang na uli ako. Ang dami-dami kong naeengkuwentrong problema at challenges, pero kinakaya ko.

“Papa ko ang pinaghuhugutan ko ng lakas, napakatapang niya,” naaalala pa naming pahayag ni Angel sa isang panayam.

Napakasakit sa kaniya ng naganap sa kaniyang ama. Mahabang panahon na itong bulag, walang kalaban-laban, harinawang maligtasan ni Mang Angel ang paghamong ito sa kanilang buhay.

At harinawang mahimasmasan ang mga taong sa halip na manalangin para sa ama ni Angel ay naghahamon pa ng debate. Hindi ito ang panahon para sa pag-aaway, simpatya at pagmamahal ang kailangan hindi lang ng pamilya Colmenares, kundi ng buong bayan.

Hindi krimen ang malayang pagpansin at pag-oopinyon, nagbabayad ng kaniyang buwis si Angel Locsin, iyon ang pasaporteng nagbibigay sa kaniya para magsalita.

Mahal – Maliit na tao pero malaki ang puso

Makulay na mahirap ang pinagdaanang buhay ng komedyanteng si Mahal bago siya pumanaw. Palaging una sa kaniyang mga prayoridad ang kanilang pamilya. Lumaki kasi siya sa hirap, gusto niyang mabago ang antas ng kanilang kabuhayan, na natupad niya naman.

Noong mga panahong kasagsagan ng popularidad nila ni Mura sa MTB ay nagkaroon pa iyon ng bonus na mga pelikula at programa sa telebisyon. Maigsi lang ang kanilang papel, mga undercover agents kunwari sila na nalulusutan ang mga kalaban dahil sa kanilang kaliitan, hindi kalakihan ang kanilang talent fee.

Nag-away noon ang tatay ni Mahal at ang kaniyang manager, saan daw ba napupunta ang suweldo ni Mahal, ang dami-dami niyang trabaho pero maliit lang ang kaniyang kinikita?

Sabi ng manager, “Siyempre naman po, bumibili rin kami ng mga damit niya, pasturyosa po ang anak n’yo, magagarang damit at sapatos ang binibili niya. Kumakain din po siya, marami rin siyang personal na kailangan, pero kayong pamilya niya ang inuuna ni Mahal.”

Sagot ng tatay ni Mahal, “Gaano na lang ba ang magagastos niya sa mga personal niyang gusto? Ang gown niya, isang yarda lang, sobra pa! Ang pagkain niya, parang kaing-pusa lang naman ang kaya niya!”

Umiyak si Mahal. Hindi lang niya masabi sa tatay niya, pero ang kaniyang katwiran, dapat lang namang bumili siya ng gusto niya. Siya naman ang nagtatrabaho, siya naman ang nagpupuyat at nagpapakapagod, kaya gusto rin niyang maramdaman ang pinagpapaguran niya.

Maliit si Mahal pero malaki ang kaniyang puso. Minsan nga ay wala siyang kapera-pera, kahit kasusuweldo lang, dahil pamilya nila ang kaniyang inuuna.

Noong matumal na ang kaniyang trabaho ay siya pa ang tumatawag sa mga show promoters, iniaalok niya ang kaniyang sarili para sa mga palabas sa probinsiya, para rin sa kaniyang pamilya ang dahilan noon.

Naririnig nating humahagikhik nang napakatining si Mahal. Parang wala siyang problemang bitbit, parang para kay Mahal ay laro lang ang buhay at walang kalungkutan, pero sa likod noon ay ang pag-aalala niya sa kapakanan ng kaniyang pamilya.

Minsan ay kinausap niya kami, may hawak siyang papel, “Mama, palitan mo na lang ito ng cash, kailangan ng papa ko, may sakit, walang pambayad sa ospital.”

Pink slip iyon ng suweldo niya sa ABS-CBN, labinglimang araw pa ang kailangan niyang hintayin para maging tseke at cash, pero kailangan na niyang papalitan para sa maysakit niyang ama.

Willie Revillame –Mistulang trumpo!

Nagmistulang trumpo nitong mga huling linggo si Willie Revillame. Mula sa Wil Tower ay dalawang linggo silang nag-show sa Puerto Galera. Sinamantala niya na rin ang pagbibigay ng ayuda sa mga lokal ng isla.

Pagkatapos ay balik na naman sila sa studio ng GMA-7, tuloy na naman ang pamamahagi niya ng tulong sa Wowowin-Tutok-To-Win, ginawan niya talaga ng paraan na hindi tumigil ang pagsahimpapawid ng kaniyang programa sa panahong nakataas ang ECQ.

“Hindi naman bumubukol ang hirap. Lahat ng paraan talaga, ginawa namin. From Pampanga sa Clark, to Puerto Galera, awa ng Diyos, e, nairaos naman ng team namin ang mga shows.

“Napakalaki lang talaga ng ginastos ng production pero ayos lang, marinig ko lang ang sigawan ng mga tinatawagan ko, masayang-masaya na ako,” unang sabi ni Willie.

Para siyang malaking puno na maraming kulisap na nakakapit sa kaniyang mga sanga at dahon sa dami ng kaniyang tinutulungan. Pero mula sa puso ang kaniyang mga ginagawa.

Ang pagmamahal niya sa kaniyang mga katrabaho ay hindi nagsisimula at natatapos sa panahon lang ng serbisyo. Maraming staff niya ang nawala nang magbawas ang produksiyon.

Pero ang mga mananahi, make-up artist at mga production staff na nawalan ng trabaho ay binibigyan pa rin niya ng buwanang ayuda. Katwiran ni Willie ay anong trabaho pa ang makikita ng mga may edad na niyang dating kasamahan?

Hindi lang iyon. Maraming kababayan pa nating pinangakuan niya nang mahabaang tulong ang tinutupad niya. Pampagamot, pambili ng mga pangangailangan, hanggang sa pagpapalibing ay si Willie pa rin ang sumasagot.

Marami rin kaming kilalang butas ang mga palad sa pagtulong, pero ibang-iba si Willie, ang pera ay hindi niya dinidiyos kungdi inaalipin. Ang kaniyang katwiran ay hubad tayong ipinanganak kaya hubad din tayong aalis sa mundong ito.

Komento ng isang kaibigan namin, “Everytime I watch Willie, all I see is his good heart. I don’t see anything bad in his eyes. Long life for someone like Willie who cares for everyone.”

Vice Ganda – Humihingi ng hustisya

Makabuluhan ang mga huling posts at inilalabas na sentimyetno ni Vice Ganda. Hindi iyon tungkol sa pag-iibigan nila ni Ion Perez, hindi rin iyon tungkol sa pang-ookray niya sa kung sinu-sino, may malasakit at pagmamahal sa mga kababayan nating nagdarahop ang lumalabas sa kaniyang bibig ngayon.

Patama iyon nang direkta sa mga opisyal ng ating gobyerno na puro corrupt, hindi paglilingkod ang inaatupag, kundi ang pagkakamal ng salapi mula sa kaban ng ating bayan.

Bilang taxpayer ay may karapatan si Vice Ganda at sinumang Pilipino na magsalita tungkol sa mga nagaganap sa ating pamahalaan. Karapatan natin iyon bilang mga Pilipinong tumutupad sa pagbabayad ng buwis. Pera natin iyon.

Kinabog na ng balwarte ng pulitika ang mundo ng showbiz, parang malaking palengke ngayon ang Senado sa pag-iimbestiga tungkol sa kaliwa’t kanang katiwaliang nagaganap.

Personalan pa ang kanilang mga birada, pintasan nang pintasan, nakakahilas pa namang tingnan ang mga lalaking bangayan nang bangayan on national television.

Humihingi ng hustisya si Vice Ganda para sa mga naghihirap nating kababayan, pandemya pa naman ngayon, kaya ang biyayang dapat mapasakamay nila ay napupunta sa bulsa ng mga kurap na nagtatrabaho sa ating pamahalaan at ng kanilang mga galamay.

Sa lahat ng kuda ni Vice Ganda ay ito ang gusto naming palakpakan nang napakalakas dahil may saysay at kabuluhan. Hindi sayang ang kaniyang laway, siya ang nagiging boses ng mga kababayan nating api na hindi kayang lumaban, nakakita si Juan dela Cruz ng tagasigaw.

Maraming nag-iisip nating kababayan ang nagbubunyi sa mga isinisigaw ni Vice Ganda, pero mayroon ding mga mahina sa komprehensiyon na bira lang nang bira, ginagawa nilang pulutan ang sikat na komedyante-TV host ngayon.

Pero nagpapakatotoo lang si Vice, pangmayorya ang kaniyang laban, hindi lang para sa sarili niyang interes at kapakanan.

At mayroon siyang karapatang sumigaw bilang isang Pilipinong nagbabayad ng kaniyang buwis at mulat sa katotohanan.

Nora Aunor – May malawak na bukirin sa Bicol

Ilampung ektaryang lupain ang naipundar ng mga magulang ng Superstar noong kasagsagan ng kaniyang kasikatan. Pangsakahan ang mga lupain, umaani taun-taon, pero nang pumanaw na ang kaniyang mga magulang ay wala nang nag-asikaso sa kanilang mga proyedad.

Ngayon na lang naasikaso ni Nora Aunor ang malawak nilang bukirin sa Bicol, nagulat ang Superstar, may animnapung ektaryang ari-arian pala siya na hindi niya pinapansin noon.

Hindi naging ugali ni Nora ang ipaglantaran ang kung anumang mayroon siya, wala sa kaniyang bokabularyo ang pagyayabang, pero kung kailangan niya nang ilabas para mayroon siyang mapatunayan ay ginagawa niya.

Anuman ang mangyari, magputukan man ang lahat ng bulkan sa buong mundo, ay Superstar pa rin si Nora Aunor. Siya pa rin ang pinakamaningning na bituin kung ituring ng lahat.

Inilabas niya ang ekta-ektarya niyang lupain bilang sagot sa mga tanong kung paano na siya kapag tinalikuran na niya ang lokal na aliwan. Baka raw mamalimos na lang siya?

Hindi na maghihirap ang Superstar. Sa lawak ng mga ari-ariang mayroon siya ay hindi na siya magugutom. Mayroon siyang sasandalan kapag huminto na siya sa pag-arte.

Puwede niyang tutukan ang pagsasaka, may mga kababayan siyang puwedeng pagkakatiwalaan para magtrabaho sa kaniyang bukirin, sapat nang ikabuhay ang taunang ani niya ng palay.

Kung gusto niya namang ibenta na ang kaniyang mga lupain ay sigurado na ang kaniyang kinabukasan, mamumuhay siya nang maalwan, hindi niya na kailangan ng ayuda ng kahit sino.

Isang patotoo ito na may pinakinabangan si Nora Aunor sa kaniyang pag-aartista. Hindi basta nalustay lang ang kaniyang pinaghirapan at pinagpuyatan. May naipundar ang kaniyang mga magulang mula sa kinita niya.

Hindi nalusaw ang mga pangarap ng Superstar. Naiangat niya sa kahirapan ang kaniyang pamilya at mayroon pang natira para sa kaniyang kabuhayan.

Manny Villar – May 335 billion pesos na kayamanan

Inilabas na ng Forbes Magazine ang Unang Sampung (Top 10) pinakamayayamang Pilipino para sa kasalukuyang taon. Halos lahat ng pinangalanan ay mga Chinese businessman. Isang purong Pilipino lang ang napasama na umookupa sa ikalawang posisyon—si dating Senador Manny Villar sa kanilang ipong kayamanang 335 billion pesos.

Ang kayamanan ng pamilya ay hindi biglaan, pinagtrabahuhan nila iyon nang maraming dekada, matinding sipag at pagtitiyaga ang naging puhunan nila bago kinilala ang pamilya Villar bilang ikalawang pinakamayamang pamilya sa ating bansa.

Matagal naming nakasama si Camille Villar sa TV5 nang maging co-host siya ni Willie Revillame, nakakasabay namin siyang tumutusok ng fishballs sa likod ng studio, katabi rin naming umuupo si Camille sa pasilyo.

Ni anino ng isang anak ng bilyonaryo ay hindi namin nakita sa pagiging simple at mapagkumbaba ni Camille. Pati sa kaniyang mga isinusuot ay hindi mo iisiping bilyonaryo ang kanilang pamilya.

Si DPWH Secretary Mark Villar ay ganoon din kasimple, marespeto siya sa kaniyang mga katrabaho, hindi mo rin makikita si Secretary Mark na iba sa iba. Isa lang siya sa marami, nakikihalubilo sa mga manggagawa, kahit pahimakas ng pagiging anak ng bilyonaryo minsan man ay hindi rin namin nakita sa kaniya.

Si Paolo na namamahala sa kanilang mga negosyo kahit minsan lang naming nakaharap ay sobrang simple rin, marunong makisama sa kanilang mga tauhan, napakagandang disiplina ng kanilang mga magulang sa kanilang magkakapatid.

Tanong ng isang kaibigan namin, paano raw kaya inuubos ang 335 billion, paanong paggastos daw kaya ang kailangang gawin ng isang pamilyang biniyayaan nang sobra-sobrang biyaya?

Ganoon nga yata ang mga tunay na bilyonaryo, hindi nagyayabang-naglalantad ng kung anumang yaman na mayroon sila, hindi nila kailangang magpapansin at magyabang dahil alam nila ang totoo nilang estado sa lipunan. – CSF