Published on

Cristy Per Minute ni Cristy FerminAgosto 1-15, 2021

    Hidilyn Diaz
 
Hidilyn Diaz
  Beth Tamayo & Sharon Cuneta
 
Beth Tamayo & Sharon Cuneta
  Dominic Roque & Bea Alonzo
 
Dominic Roque & Bea Alonzo
  Johnny Manahan
 
Johnny Manahan
  Piolo Pascual
 
Piolo Pascual
  Wilma Doesnt
 
Wilma Doesnt
  Angel Locsin
 
Angel Locsin
  Julia Montes & Coco Martin
 
Julia Montes & Coco Martin
  Jinkee Pacquiao
 
Jinkee Pacquiao
  Julia & Dani Barretto
 
Julia & Dani Barretto
  Andoy Ranay
 
Andoy Ranay

Mabuhay ka, Hidilyn Diaz!

Parang lupa na ilampung taong tigang na tigang ang diniligan ni Hidilyn Diaz sa pagkopo ng gintong medalya sa Olympics. Isang matinding pangarap na natupad pagkatapos nang siyamnapu’t pitong taon.

Nagbubunyi ang buong bayan sa kaniyang tagumpay, isang Pinoy na naman ang nagsulat ng pangalan ng ating bayan sa mapa ng mundo, mabuhay si Hidilyn Diaz!

Noong pinarangalan na ang ating kinatawan bilang gold medalist sa weightlifintg ay tumatawid sa atin ang matindi niyang kailgayahan. Hindi pala imposible kapag ibinigay ng Diyos ang karangalan at kapag pinagbuwisan ng sakripisyo ng may katawan ang inaasinta niyang pangarap.

Noong tugtugin na ang Lupang Hinirang habang napakaibabaw ang ating bandila sa dalawa nitong katabi ay wala na, nakiiyak na ang buong bayan kay Hidilyn, napakasarap nga namang maging Pilipino sa pagbubunyi para sa ating kababayan.

Nagtagumpay si Hidilyn Diaz, nagkaroon ng saysay ang kaniyang mga sakripisyo, itinuturing siyang bayani ng ating bayan ngayon lalo pa’t panahon ng pandemya na puro kahirapan ang ating pinagdadaanan.

Ang nakakalungkot lang ay umandar agad ang huwad na makinarya ng mga pulitikong dating nangmamaliit kay Hidilyn. ‘Yun ang mga taong sa halip na tumulong noong mga panahong ni walang panggastos ang nag-eensayo nating atleta ay nagdikdik pa nga sa kaniya sa isang kontrobersiyang napakalayo sa katotohanan.

Kakabugin ng mga mukha ng mga taong ‘yun kahit ang mga ibinebentang makakapal na sangkalan sa kanilang pagbati ng mabuhay kay Hidilyn Diaz. Ang kakapal!

Nasaan ba sila noong mga panahong kahit galon ng tubig ay ginagawang pabigat ni Hidilyn sa kaniyang pag-eensayo? May nakaisip man lang bang mag-abot ng tulong sa kaniya?

At ngayong hawak na niya ang medalyang ginto ay parang naging bahagi sila ng pangangarap at pagsasakripisyo ng ating bayani? Ang kakapal talaga!

Napakahirap ng ating sitwasyon ngayong pandemya. May bulkang pumuputok, laganap ang pagbaha sa maraming probinsiya dahil sa walang tigil na pag-ulan, milyun-milyon ang nagugutom sa kawalan ng trabaho.

Ang unang gintong medalyang iniuwi ni Hidilyn Diaz mula sa Tokyo, Olympics ay literal na biyaya para sa ating lahat.

Mula sa halos isandaang taon ng tagtuyot ay isang napakalakas na buhos ng ulan ang kaniyang hatid. Wala ngang imposible.

Mabuhay ka, Hidilyn Diaz!

Beth Tamayo – Malapit nang manganak

Malapit nang manganak si Beth Tamayo. Nagkita sila sa Las Vegas ni Sharon Cuneta para sa isang masayang dinner at kuwentuhan. Kasama ng magandang aktres ang mister niyang puti.

Hindi makakalimutan ni Beth ang Megastar. Noong mga panahong wala pang direksiyon ang buhay niya sa Amerika ay malaking suportang pampinansiyal ang kusang-loob na ipinadala sa kaniya ni Sharon.

Ganoon naman si Mega, hindi nito ipinagmamalaki at ikinukuwento ang magagandang bagay na kaniyang nagagawa, ang mismong mga taong tinutulungan na lang nito ang nagkukuwento.

Nagkaroon ng baby shower para kay Beth Tamayo sa kanilang bahay sa San Francisco, California. Maraming kaibigan niyang artistang sa Amerika na rin naninirahan ang dumalo.

Special guest niya ang kaniyang pamangking si Dominic Roque na dumating na kasama ang napapabalita nitong karelasyong si Bea Alonzo.

Wala nang nagawa ang dalawa. Kung dati’y mga kamay lang nila ang nakikita sa mga larawang ipino-post nila, sa baby shower ay kitang-kita na ang kanilang mga mukha, lantaran na silang nakikita.

Nakakatuwa ang magkarelasyong ito. Para silang mga pako na nakatago ang katawan pero kita naman ang kanilang ulo. Buking na buking naman na silang dalawa ang magkasama sa Amerika pero kung bakit pilit pa nilang itinatago ‘yun.

Nandoong makita ang kamay ni Dom na ipinaghihimay ng seafood si Bea, minsan naman ay kamay ni Bea lang ang nakikita sa picture, pero katabi naman ang aktor.

Ngayon ay wala na silang maidedenay, sa mga retrato sa baby shower para kay Beth Tamayo ay palagi silang magkatabi, wala na silang maitatago.

Bea Alonzo at Dominic Roque – Aamin na ba?

Maraming kababayan na natin sa Amerika ang lantarang nakakakita ngayon kina Bea Alonzo at Dominic Roque na magkasama. Kahit sa mga larawang ipino-post nila ay nagkaroon na ng mukha ang mga kamay at paa na dati nilang ipino-post.

Napakaligaya siguro ngayon ni Dominic dahil hindi na siya itinatago ni Bea, hindi tulad noon na magkasama nga sila, pero hindi siya nakikita sa retrato.

Maraming nagtatanong kung bakit natagalan bago inamin ni Bea na si Dominic nga ang kaniyang karelasyon ngayon. May mga nagkokomento na hindi raw kasi sila magka-level sa estado ng pagiging artista nila.

Maaaring may mga sariling dahilan si Bea, pero napakahirap noon para sa binata, dahil parang anino lang siya para sa aktres. Idinedenay siya ni Bea, itinatago, samantalang matagal na silang magkarelasyon.

Pero may mga nagsasabi ring ginagamit lang daw kasi ni Dom si Bea. Gusto lang niyang sumikat kaya nagsusumiksik siya kay Bea. At nadagdagan pa ‘yun ng kuwentong may hindi raw kagandahang imahe si Dominic.

Kung totoong nagmamahalan ang dalawang tao ay walang level-level na kasali sa relasyon. Kahit sikat na artista ay puwedeng magmahal sa isang extra kapag tinamaan sila ng pana ni Kupido.

Walang ganoon, walang pinag-uusapang gamitan, pagmamahalan lang ang barometro. Ano naman ngayon kung mas kilala si Gerald Anderson na dating karelasyon ni Bea kaysa kay Dominic?

Wala dapat pagkukumpara. Mas popular nga si Gerald, pero niloko naman nito ang dalaga, mas panalo pa rin si Dominic Roque na ramdam nating walang gagawing anuman na ikakasakit ng damdamin ni Bea.

Johnny Manahan – GMA Artist Center consultant na

Gaano katotoo ang nakarating na impormasyon sa amin na maraming Kapamilya stars ang nagtatawagan ngayon kay Direk Johnny Manahan para sa kagustuhan nilang lumipat sa GMA-7?

Consultant na ngayon ng GMA Artists Center ang mahusay na direktor at si Ms. Mariole Alberto, mayroon na silang karapatang salain ang mga personalidad na gustong kumabilang-bakod sa Siyete, kaya ang nirerespeto nilang si Mr. M ang nilalapitan nila ngayon.

Pinangalanan pa ng aming source kung sinu-sinong Kapamilya stars ang nagpaplanong lumipat, nakagugulat ang listahan, puro may pangalan ang mga artistang nagpaplanong iwanan na ang ABS-CBN.

Sabi ng aming impormante, “May mga Kapamilya stars na madalas magsabing hindi nila iiwanan ang network nila. Nababasa natin ‘yun sa mga posts nila.

“Pero kapag naiisip nila ang sitwasyon nila na wala naman silang trabaho, natural lang na mag-isip na sila. May pamilya silang binubuhay, sila lang ang inaasahan, kaya ano ang papasok sa isip nila?

“Meron ngang isang personality doon sa ABS-CBN na panay-panay ang pagsasabing forever siyang magiging Kapamilya dahil doon siya nagsimula, pero ang lumabas na kuwento, e, nagpapalako rin naman siya sa GMA-7?

“Lagi nating iisipin na walang kinikilalang batas ang bitukang gutom,” makabuluhan pang mensahe ng aming source.

Man of few words si Direk Johnny Manahan, hindi natin maaasahan ang magaling na director na magsasalita tungkol sa kuwento, pero sumusumpa ang aming source na maraming Kapamilya stars ang nagtatawagan ngayon sa kaniya para kumabilang-bakod na.

Piolo Pascual – Lilipat na nga ba sa GMA-7?

Mas maraming naniniwala sa kuwentong umiikot ngayon na isang araw ay Kapuso na rin si Piolo Pascual. Malakas ang kanilang kutob na lilipat na rin sa GMA-7 ang guwapong aktor.

Ang kanilang barometro – kung nasaan si Direk Johnny Manahan ay siguradong nandoon din si Piolo. Hindi sila puwedeng maghiwalay.

Minsan na nilang pinatunayan ‘yun nang buuin ni Mr. M ang konsepto ng Sunday noontime show ng Brightlight Productions na ipinalabas sa TV5, ang SNL, na sa hindi inaasahang pagkakataon ay naging SLN ang kapalaran.

Poste si Piolo ng musical variety show kasama sina Maja Salvador at Catriona Gray at marami pang ibang artista ng ABS-CBN. Sayang nga lang dahil naka-one season lang ang programa.

Sabi ng aming source na hindi nanununog at nangunguryente, “Maghintay lang kayo. One day, nasa GMA-7 na rin si Piolo. Kung nasaan si Mr. M, nandoon din siya. Parang tatay na kasi niya si Mr. M.

“Hindi pa lang nila pinalulutang ang paglipat ni Piolo, paisa-isa lang muna, pero huwag na kayong magugulat kapag lumabas ang totoo,” sabi ng aming impormante.

Kung bakit naman may nakausap din kaming source na artista na ganoon din ang sabi, inaayos na raw ang nalalapit na paglipat ni Piolo sa GMA-7, sina Mr. M at Ms Mariole Alberto ang nag-aasikaso sa pagkabilang-bakod ni PJ.

Parang copy paste lang ang sinabi ng aming kausap na personalidad, “Nasa Amerika pa si Piolo ngayon, may ginagawa siyang movie doon, pero hindi ba puwedeng umandar ang transaction kahit wala siya dito?

“Ano naman ang ginagawa ng mga virtual communication ngayon? May mga kontratang niluluto nang malayuan. Kung nasaan si Direk Johnny Manahan, siguradong nandoon din si Piolo,” plakado sa una naming source na pahayag ng kausap naming kilalang personalidad.

Wala pang kukumpirma ng istoryang ito, wala pang magsasalita, hintayin na lang natin ang mismong araw na Kapuso na rin si Papa P.

Wilma Doesnt – Engaged na!

Hindi lang pangalawang glorya ang dumating sa buhay ng magaling na modelo-komedyanang si Wilma Doesnt. Pinagpatung-patong na glorya ‘yun dahil noong kaniyang kaarawan mismo ay nag-propose na ang labing-apat na taong karelasyon niyang si Gerick Livelo Parin.

Sabi ni Wilma, “Hindi kasi ako sumuko. Hindi ako naging duwag sa pakikipagrelasyon. Sabihin na nating nagkaroon ako ng mga maling decision, pero hindi ko pa rin masasabing pagkakamali ‘yun dahil may iniwang mga anak sa akin.”

Kinuntsaba ni Gerick ang kaniyang mga anak at kaibigan, pinapunta siya sa bar para kunwari’y kausapin ang kliyenteng magpapa-cater sa isang okasyon, pero proposal pala ang magaganap.

Mahusay sa buhay si Wilma. Maaga pa lang, basta wala siyang taping at shooting, ay nasa palengke na siya para mamili ng mga kakailanganin sa kanilang karinderya. Ang kaniyang mga anak ang serbidora, siya ang humahawak ng budget at marketing, si Gerick naman ang nagluluto.

“Kailangang marunong taro sa buhay lalo na ngayong pandemic. Nagrarasyon din ako ng packed food, nagke-catering, basta marangal at legal, pinapasok ko ‘yun!” mapagkumbabang sabi ng komedyana.

Pinaghahandaan na nila ngayon ni Gerick ang kanilang pagpapakasal sa March 22, 2022. ‘Yun din ang petsa ng anibersaryo ng kanilang pagkikilala labing-apat na taon na ang nakararaan.

Nadiskubre si Wilma ng isang fashion designer habang nagwawalis sa kanilang bakuran nang nakapayong. Ayaw niyang mapaso sa init ng araw, ayaw niyang umitim ang kaniyang kutis, kaya siya nakapayong habang nagwawalis.

Angel Locsin – “Hindi bale nang chubby, kaysa sa ugly”

Parang pabiro pero totoo naman ang sinabi ni Angel Locsin na “Hindi bale nang chubby kesa sa ugly.” Nagsasabi lang siya ng katotohanan dahil sa kabila ng kaniyang timbang ay napakaganda niya naman talaga.

Sa hirap ng buhay ngayong pandemya na walang trabahong pagkukunan ng ikabubuhay ang milyon nating mga kababayan ay kung bakit naman kasi ang katawan ni Angel ang pinagtutuunan ng mga bashers niya.

Napakaraming bagay na dapat nilang pahalagahan para sa ikauunlad ng estado ng kanilang buhay pero kung bakit ang pambubusisi sa malaking timbang ng katawan ng aktres ang parang prayoridad nila.

Mabuti na lang at kalmado lang si Angel, hindi siya sumasagot nang pabastos ang dating, tanggap niya ang katotohanan na totoo namang mataba siya.

Ano nga naman ang laban niya sa mga taong walang magawa sa buhay kundi ang mang-bash lang nang mang-bash ng mga artista? Mapapagod lang siya sa pagsagot at magsasayang ng panahon pero patuloy pa rin siyang lalaitin.

Sa ngayon ay tinututukan na ni Angel ang kaniyang kalusugan, ang kaniyang pangangatawan, hindi dahil sa nasasaktan siya sa mga umuupak sa kaniya kundi para sa sarili niyang interes.

Hindi na nga naman siya bumabata, kailangan na niyang gumawa ng paraan para tamang timbang lang ang dapat na meron siya, dahil malakas na kaway sa pagkakasakit ang anumang sobra.

Pero balik tayo sa pabiro niyang sinabi na hindi bale nang chubby kaysa naman ugly. Totoo naman ‘yun, sa kabila ng kaniyang timbang ay hindi pa rin maitatago ang kaniyang kagandahan, isa pa rin siya sa pinakamagandang artistang Pinoy.

Sabi nga ng kaibigan naming propesor, “Oo nga naman. Masaklap naman ‘yung ang taba-taba mo na nga, e, hindi ka pa kagandahan. At least, si Angel, masyuba man siya, e, beautiful pa rin!”

Kung may malasakit ang mga bashers sa timbang ni Angel, siyempre’y mas mayroon naman ang aktres dahil katawan niya ‘yun, siya ang nakakaramdam ng hirap gumalaw dahil sa sobra niyang bigat.

May problema ba doon? Mas sila pa ba ang nakakaalam ng kung ano ang dapat gawin ni Angel para bumagsak ang kaniyang timbang?

Coco Martin at Julia Montes – Nagpakatotoo na

Tama ang mga obserbasyon ng mga nakausap namin tungkol sa paglantad nina Coco Martin at Julia Montes. Sa pinakamatagal na panahon ay itinago nila ang kanilang relasyon.

Makita man silang magkasama sa labas ay para naman silang mga holdaper na nakatakip ang mga mukha, ayaw nilang makita ng mga miron na magkasama sila, nagpapanggap silang ibang tao.

Pero ngayon ay lantaran na silang nakikita, magkaangkas sa motor, pati bubong ng bahay ay inakyat na nilang magkasama. Ganoon na sila ngayon, wala na silang maskarang suot, hindi na pahulaan kung sino sila.

Ginutom nila ang publiko tungkol sa kanilang relasyon, nagtago sila nang mahabang panahon para maging interesado ang publiko tungkol sa kanila, dahil meron silang pagtatambalang pelikula.

Kapag para sa kanilang interes ay puwede naman pala silang magpakita, para sa kanilang career ay puwede naman pala silang magpakatotoo, ganoon ang suma sa kanilang ginawa.

Harinawang magtagumpay ang pelikulang ginagawa ngayon nina Coco at Julia. Sana nga ay mabuhay ang interes ng manonood sa kanilang pinagbibidahang proyekto. Paano kung baliktad ang mangyari?

Sabi ng kaibigan naming propesor, “Paano kung nainis pala sa kanila ang mga kababayan natin? Paano kung naumay pala ang marami sa kadedenay nila?

“Paano kung maisip ng publiko na kaya lang sila lumabas nang lantaran, e, dahil pagkakakitaan pala nila ang paglabas nila? Defeated ang purpose nila.

“May mga artista talagang pinaninindigan ang pagsisinungaling nila nang mahabang panahon, pero kapag ang interest na nila ang nakataya, bumibitiw rin naman sila!” napakadiing komento ni prop.

May punto ang obserbasyon ng aming kaibigan. Puwedeng mangyari ang ganoon. pero marami rin namang tagasuporta sina Coco at Julia. Piyesta ang pelikulang ito para sa kanila.

Sa wakas! Nagpakatotoo na ang kanilang mga idolo! Dahil may ibinebenta silang produkto!

Jinkee Pacquiao – Binabash pa rin sa social media

Kapag napapasadahan namin ang mga bira at pamimintas kay Jinkee Pacquiao ay nakakaramdam kami ng pagkaawa sa kaniya. Punumpuno kasi ang social media ng mga pangmemenos sa misis ni Pacman.

Pero kapag ninamnam naman nating mabuti ang dahilan ng pamba-bash kay Jinkee ay makakakita tayo ng punto kung bakit. May katwiran ang mga bashers. Mayroon silang pinanggagalingan.

Ang buod lang naman ng pagpansin-pangba-bash kay Jinkee ay ang ginagawa niyang pagpapalutang ng kaniyang mga branded na kagamitan. Kaniya naman ‘yun, siya ang bumili, wala namang bulsang nalaslas sa pagsunod niya sa kaniyang mga kapritso.

Pero pandemya nga naman ngayon. Panahon ng kahirapan hindi lang ng Pilipinas kundi maging sa buong mundo. Isang malaking insulto ang tingin ng mga kababayan natin sa kaniyang mga ginagawang pagmamayabang sa kung anumang mamahaling branded stuff na meron siya.

Minsan ay may nagtanong sa amin, hindi raw ba kayang supilin ni Senador Manny Pacquiao ang kaniyang misis? Naturingan nga naman siyang Pambansang Kamao na pinatataob ang kaniyang mga kalaban sa lona pero bakit hindi man lang niya mapagpayuhan ang kaniyang misis na tigilan na ang pagpo-post ng mga bagay-bagay na may himig ng pagyayabang?

Siguro naman ay ginagawa rin ‘yun ni Pacman, pero ang tanong, sinusunod ba naman ni Jinkee ang kaniyang asawa? Pero parang nang-iinis na lang din siguro si Jinkee ngayon.

“Mamatay kayo sa inggit!” ‘yun lang siguro ang naglalaro sa kaniyang utak ngayong inuulaol siya ng bashing.

Julia at Dani Barretto – Di kasundo ang mga ama

Nag-one-plus-one ang ating mga kababayan. Oo nga naman. Nakanino nga kaya ang problema, nasa nanay ba o sa mga anak, bakit ganoon ang sitwasyon?

Anak sa una ni Marjorie Barretto si Daniella, si Kier Legaspi ang ama nito, anak naman niya si Julia kay Dennis Padilla.

Hindi man magkamukha ang magkapatid kahit isa lang ang kanilang nanay ay meron silang pagkakapareho. Hindi kasundo nina Dani at Julia ang kanilang mga tatay.

Kung lalaliman natin ang pag-iisip ay si Marjorie ang babagsakan ng sisi bakit ganoon ang kaniyang mga anak sa kani-kanilang ama. Siya kasi ang kasama nina Dani at Julia, siya ang gumagabay sa magkapatid, pero bakit pareho ang damdamin nina Dani at Julia sa kani-kanilang ama?

Naniniwala kami na may independenteng pag-iisip na sina Dani at Julia, nasa wastong gulang na sila, pero mas naniniwala kami sa malaking partisipasyon ng ina sa pagpapalaki sa kaniyang mga anak.

Sabi nga, kung ano ang naririnig-nakikita ng mga bata sa matatanda ay ‘yun din ang kanilang ginagawa, ‘yun ang kanilang ginagaya.

Ayaw naming husgahan si Marjorie bilang ina na kulang na kulang sa paggabay sa kaniyang mga anak, pero ‘yun ang lumalabas ngayon, dahil hindi maganda ang relasyon ng kaniyang mga anak sa mga tatay nila.

Dapat ay kay Marjorie nagmumula ang pagpapaunawa sa kaniyang mga anak na anuman ang kakapusan at kalabisan ng kaniyang mga dating karelasyon ay hindi pa rin natin maitatanggi ang katotohanan na ama pa rin nina Dani at Julia sina Kier at Dennis.

Hindi magandang ehemplong lumalabas ang lantarang matabang na relasyon ng magkapatid sa kanilang mga tatay, kawalan ‘yun ng pasasalamat, dahil kung wala ang kanilang mga ama ay wala rin sila ngayon sa mundong ibabaw.

Kumbaga sa boksing ay si Marjorie ang inaasahan ng ating mga kababayan na tatayong referee, siya ang tagaawat kapag nagkakasakitan na ang magkabilang panig, dahil nasa kaniyang pagkandili nga sina Dani at Julia.

One-plus-one lang.

Direk Andoy Ranay – May kayabangan ang dating

Marami palang ginawang proyekto sa GMA-7 si Direk Andoy Ranay. Pinagtrabahuhan niya naman ang mga programang ‘yun pero hindi pa rin natin maiaalis ang katotohanang hindi natin binabasag ang pinggan na pinagkainan natin.

Pinagbuksan siya ng pintuan ng GMA-7, binigyan ng mga oportunidad, kahit pa nagsimula siya sa ABS-CBN. ‘Yun ang nagdidiin ngayon sa direktor sa pinakawalan niyang matalim na pahayag kailan lang na sinagot ng mga artista ng GMA-7.

Ang kaniyang opinyon, aanhin daw ang prangkisa, kung basura naman ang mga ginagawang trabaho? Doble ang talim ng kaniyang post, puwede niyang sabihin na hindi naman ang GMA-7 ang kaniyang tinutukoy, puwedeng TV5 ang kaniyang pinariringgan.

Pero alinmang network ang kaniyang pinatatamaan ay hindi pa rin hinihingi ang ganoong pahayag mula sa isang tulad ni Direk Andoy Ranay na nakasukob din sa isang malaking payong ng industriya ng telebisyon.

May kayabangan ang dating. Mapagmarunong. Namimintas. Nangmemenos. Siya lang ang magaling sa lahat ng magaling at wala nang mas gagaling pa sa kaniyang panlasa.

Si Jaclyn Jose ang unang sumagot sa direktor. Sumang-ayon naman si Ai-Ai delas Alas. Hindi man nagpo-post ang iba pang mga artista ng GMA-7 ay sobrang umaray sa padaskul-daskol na pagbibitiw ng mga salita ni Andoy.

Pinaliit ng direktor na ito ang kaniyang mundo nang dahil lang sa kawalan ng kontrol sa kaniyang emosyon. Napakaraming naibabato pabalik sa kaniya, kinukunsensiya siya ng mga personalidad na nakatrabaho niya sa Siyete, ano raw ba ang gusto niyang palabasin?

Sabi ng kaibigan naming propesor, “Nakalimutan na yata ng hambog na direktor na ‘yun na may pera sa basura? Kung basura ang panukat niya sa mga proyektong ginagawa ng pinatatamaan niyang network, at least, may basura pa rin silang ibinebenta!

“Mas nakakalungkot ang magagaling ngang gumawa ng project, pero hindi naman nila maayos na maibenta, dahil tinanggalan sila ng prangkisa!” madiing komento ni prop.

Sabi ni Jaclyn Jose, “I don’t fear the enemy who may attack me, I fear the fake friend who will still hug me.”

May isa pang kasabihan, “It’s better to have an enemy who slaps you in the face than a friend who stabs you in the back.”

Dahil basura na rin lang ang ginawang puhunan ng direktor sa kaniyang panglalatigo, idagdag na rin natin na ang kaibigan ay parang basura, kailangang ihinihiwalay natin ang nabubulok sa hindi. CSF