Da Hu? • February 16-28, 2023

ni Vuvü at Eng Eng

	Cristy Fermin	Willie Revillame

Da Hu itong female personality na pa-booking?

Ilang taon na ang nakararaan ay regular “caller” ng isang simple lang pero kilalang pimp ng mga artista ang isang female personality. Walang paltos iyon, tuwing malapit na ang katapusan ay siguradong tatawagan niya na ang Boogie Wonderland (bugaw), dahil kailangan niya kasi ng datung.

 Tuwing katapusan kasi ang bayaran ng inuupahan nilang apartment ng kaniyang mister, iyon din ang nakatakdang oras ng pagbabayad nila ng sasakyan, pati ng kanilang ilaw, tubig at marami pang ibang bayarin.

 Kuwento ng dyugaling (bugaw) ay hindi raw naman maluho ang female personality, pambayad lang talaga sa kanilang mga pangangailangan ang kailangan niyang ihanap ng solusyon, kaya nagpapa-booking siya.

 “Once a month lang niya ginagawa ang ganoon, hindi siya iyong regular na humihingi ng booking para sa mga granatsa niya. Pambayad lang talaga ng mga utilities nila ng mister niya ang concern niya.

 “Pagkatapos ng booking na iyon, mananahimik na naman siya, hanggang sa dumating na naman ang katapusan, walk na naman siya,” simulang kuwento ng aming source.

 Ang ipinagtataka ng samahan ng mga Boogie Wonderland ay kung paano iyon nagagawa ng female personality nang hindi nakahahalata ang asawa niyang artista rin. Nalulusutan niya ito nang wagas na wagas.

 “Malaking palaisipan nga sa mga dyugaling iyon, e! Gusto nilang isipin na dahil hindi naman kalakihan ang kinikita nilang mag-asawa, e, pinapayagan ni ____(pangalan ng mister ng female personality) ang wife niya na gumawa ng sideline.

 “Pero wala naman sa character noong mister niya ang ganoon, saka mayroon pa siyang malalapitang kapamilya niya na makatutulong sa kanila. May lalaki ba namang papayag na magbebenta ng katawan ang mahal niya para lang maisalba ang mga gastusin nila?

 “Pero iyon talaga ang nangyayari, e! Kapag malapit na ang katapusan ng bawat month, e, nagpapa-booking ang girl! Maganda naman ang presyo niya, hindi naman siya binabarat-barat, kaya sobra pa siguro sa mga needs nilang mag-asawa ang talent fee ng girl!

 “Tumigil na lang ang girl noong medyo gumanda na ang kabuhayan showcase nila. May malaking halaga ang napasakamay ng husband niya. Nakaginhawa rin sa kanila.

“Noong minsang tawagan siya ng booking agent niya, e, sinabi ng girl, ‘Ate, rest muna ako, kapag kailangan na lang uli.’ Kaya ni n’yo iyon?” mahabang kuwento ng aming source.

 Da Hu itong female personality? Hula na!

Cristy Fermin at Willie Revillame, Nagkasira na?

Parang bulkang sumabog si Willie Revillame sa kaniyang programang Wowowin noong isang araw upang sumbatan ang mga taong sabi niya’y natulungan niya sa showbiz at ngayo’y sinisiraan siya.

Dahil lamang pala ito sa sulsol ng mga taong ayaw magutom.

Hindi ito pinalampas ng radio host na si Cristy Fermin. Sa kaniyang programang Cristy Ferminute at detalyadong sinagot ni ‘Nay Cristy ang mga bira ni Willie.

Pinanood muna ng buong buo ni Cristy ang mga sinabi ni Willie sa Wowowin para alam niya ang kaniyang isasagot.

“Pinanood ko po, may sinabi siya na isang reporter ng ABS-CBN na kumandidatong konsehal na tinulungan daw niya, may celebrity daw na binira siya, eh, itong celebrity na ito, eh, maka-Diyos pa ang datingan at noong ikasal daw ang kapatid, eh, tumira pa yata ang mga magulang sa bahay niya.”

“At mayroon daw isang tao na, ‘binigyan ko pa nga ‘yan ng condo unit, eh, binigyan ko pa ng sasakyan tapos tatawagin akong mayabang?’

“Kaninang umaga po ay tinext ko po si Willie Revillame ang sabi ko, ‘sana lang pinanood mo nang buo ang mga sinabi ko sa CFM tungkol sa ‘yo. ‘Yung terminong mayabang sinabi ko ‘yun, pero iba pala ang interpretasyon mo.”

“Kahapon, ipinagtanggol pa naman kita tungkol sa ABS-CBN, bago ka magsalita mag-isip ka muna! Pero kung gusto mo ng giyera sa kabila ng pagmamalasakit ko sa ‘yo, nakahanda ako!’

“Dahil po dito ay tumawag siya. Unang sagot ko palang…hindi ko alam kung paano ko ilalarawan ang mga salita ko. Lahat siguro ng mga binitiwan kong salita kaninang umaga patungkol sa kaniya bilang sagot (ay) ‘yung mga bagay na ayaw niyang marinig na sa unang pagkakataon ay ipinatikim at pinalasa ko sa kaniya (Willie).

“Unang-una po mga kapatid ang pinakaayaw ko po ‘yung nanunumbat. Sabi ko nga ang mantra ng buhay ko, anumang ginagawa ng ating kanang kamay ay hindi na dapat pang ipinaalam sa kaliwa.

“Ngayon kung tutulong po tayo at isusumbat lang pala natin pagdating ng panahon, ‘wag na lang tayong tumulong, ‘yun lang naman ‘yun di ba?

“Sa pagsasalita ko nang dire-diretso, nakiusap siya kaagad, ‘Sandali! Magpapaliwanag ako, magpapaliwanag ako. Nag-iisa lang ako, wala akong nakakausap.’

“Hindi mo kailangang magpaliwanag sabi ko sa kaniya. ‘Titirahin mo ako mamaya!’” sabi raw ni Willie.

Ang sagot ni Nay Cristy ay, “Hindi kita titirahin, magsasalita lang ako pero hindi kita bibirahin dahil ipararamdam ko sa ‘yo kung ano ang tunay na kahulugan ng pagmamahal at pagmamalasakit.”

Tinanong ni Nay Cristy si Willie kung pinanood nito nang buo ang Cristy Ferminute kung paano nagiging mayabang ang Wowowin host.

“Hindi raw. Ang nagsulsol sa ‘yo ay mga taong takot magutom kapag nawala ka. Ito’y mga taong ‘yes people.’ Ito ‘yung mga taong kapag nawala ka ay hindi sila kakain dahil hindi po tama.”

“Parang kolum, title pa lang ang naririnig nagwawarla na! Title palang ang nababasa nagwawala na! Hindi muna tingnan ang kabuuan.”

“Ano ang nangyari sa ‘yo? Pati ang mga reporters na tinulungan mo noong pandemya, isinudsod mo sa kanila ngayon. ‘Wag ka na lang tutulong kung pagdating pala ng araw isusumbat mo lang.”

“Sabi niya, ‘hindi ganito kasi ‘yan ako ang binibira! Ako ang binibira ng mga tao dahil sa pagsasara raw ng AMBS (Advance Media Broadcasting System).’

Tanong daw ni Nay Cristy, “Bakit hindi mo alam na magsasara na ang inyong istasyon?’ Wala raw kumakausap sa kaniya. Tumatawag daw siya at wala raw gustong makipag-usap sa kaniya.

“Yun ang sabi niya (Willie), sabi ko, ikaw na lang ang hindi nakakaalam. Hindi tama ‘yan. Dapat kausapin mo sila. Araw-araw daw po siyang tumatawag pero walang gustong makipag-usap sa kaniya,” ang paliwanag ni Nay Cristy.

“Hindi mo pala napanood nang buo itong CFM February 6 at February 7, magwawarla ka na kaagad? Magsasalita ka na kaagad ng kung anu-anong panunumbat?” Gigil pang sabi ni Nay Cristy.

At dito na inamin ni ‘Nay Cristy na siya pala ang binanggit na binigyan ng sasakyan at condo unit sa Will Tower.

“Bakit hindi mo ikuwento kung saan nanggaling ang sasakyan at ‘yang condo unit na mula noong 2017 na hanggang ngayon na nagsasalita ako, minsan ko lang nakita noong lagyan ko ng mga muwebles at ng mga paintings!

“Never akong nagpunta doon ulit kahit tanungin n’yo ang guwardiya n’yo at tagapamahala ng building. Hindi ko pinuntahan ‘yan kahit minsan! Ano ‘yung sasakyan? Tayo ang nagtulung-tulong para makapasok ka dito sa TV5 (Wowowillie, 2013)!

“Anong sabi ni boss Vic del Rosario? Dapat kumukuha ka kay Willie dahil ikaw ang nagpasok sa kaniya dito. Dapat kumukuha ka sa kaniya ng 20 per cent monthly.

“Hindi ko po ginagawa ‘yun! Ang aming kasunduan, pera o sasakyan. Doon po nagmula ‘yun! Kaya nangyari ‘yun. Pero pinaghirapan ko po ‘yan at hindi ko hiningi at sa kaniya nanggaling.

“Ngayon pinaplano ko, sinabi ko kay Revo (anak ni Nay Cristy) pagkatapos ng pagkakataong ito kukuha ako ng papeles ibabalik ko kay Willie Revillame ‘yung pinaghirapan kong condo unit na ‘yan kahit may transaksyon pa kami. Wala na ‘yung sasakyan naibenta ko na, wala na napalitan ko na!”

Mainit pa ring pinag-uusapan ang nangyari sa pagitan nina Willie Revillame at ni Cristy Fermin.

Kamakailan ay nag-trending ang dalawa dahil sa sagutan nila sa diumano’y panunumbat ni Willie sa mga taong kaniyang natulungan.

Sa episode noong nakaraan show ni Nay Cristy sa Cristy Ferminute ay tinalakay nilang muli ang iba pang personalidad na pinaringgan raw ni Willie na sina Ogie Diaz at Gab Valenciano.

Labis na nasaktan si Nay Cristy sa mga sinabi ni Willie sa kaniyang programang Wowowin at hindi raw ito basta basta mawawala.

“Pambansang kahihiyan po ang aming inabot nina Ogie Diaz at Gab Valenciano. Yun po ay hindi mahihilot. Yun po ay hindi pupuwedeng daanin lang basta sa ganito na lang. Masakit pong masyado. Kaya para matigil na, ibalik sa kaniya ang kung ano mang isinusumbat niya,” sabi pa ni Nay Cristy.

Dagdag pa ni Nay Cristy, “At Willie, si Ogie Diaz ay ibang klaseng tao na, kung nilalait-lait mo siya ngayon, kung noon ay wala kang respeto sa kaniya, tumigil ka. Yang bibig mo, itikom mo. Milyonaryo na si Ogie Diaz, pero hindi niya ipinag-iingay. Hindi niya ipinagsasasabi ang mga tulong na naibibigay niya sa maraming foundation. Ang pagtulong ni Ogie ay hindi na niya pinapangalandakan sa iba.”

“Hindi siya nagpupunta sa isang lugar, may dalang camera, na andun ka pa lang at nagbibigay ng ano, eh, sinasabihan ka na ng, ‘I-edit n’yo na yan! I-edit n’yo na agad-agad yan! Bukas ipapalabas na yan!’

“Hindi ganoon si Ogie. Tahimik lamang siyang tumutulong. Ang kaniyang pagtulong ay mula sa puso‌, hindi mula sa nguso,” lahad pa ni Nay Cristy.

Medyo magtatagal pa ang isyung ito, lalo na at inamin ni Nay Cristy na talagang nasaktan siya sa ginawa ni Willie.

Kahit nagkausap na ang dalawa at humingi na ng tawad si Willy ay sinabi ni Nay Cristy na kaya niyang magpatawad. She will forgive, but she remembers names.