Published on

Batang North End ni Noel Lapuz

Hataw 2024 or kalma lang?

ni Noel Lapuz

A year of realization and reflection on the value of life. Ganito ko itinuring ang taong 2023.

Naging sobrang abala ako at laging naghahabol simula nang ako, kasama ang aking pamilya, ay dumating dito sa Canada noong 2009. It has been 14 years na ganito ako. May full-time job, may part-time job, at may mga businesses on the side. Kadalasan ay napakaikli lang ng oras na nailalaan ko sa aking pamilya. Mabuti na lamang at super woman ang aking asawa na siyang 100 per cent na nakatutok sa aming mga anak. Ngayon ay binata na silang lahat. We survived.

Natural lamang na kapag bagong dating ka sa isang lugar tulad ng Canada ay hahataw ka nang husto para sa magandang kinabukasan ng iyong pamilya. Mararanasan mo ang mga challenges ng buhay at minsan, ang pag-iisip kung tama ba ang pagpili sa Canada bilang iyong bagong tahanan.

Dumating na ako sa punto noong bago pa kami na kinwestyon ko ang aking sarili kung tama ba ang aming naging desisyon na dito manirahan. Hindi agad ito nasagot. Dumaan ang panahon at mga pagsubok bago ko nasabi sa aking sarili na, walang tama o mali sa anuman ang aming naging desisyon. Kasi, ang mahalaga ay kung paano namin naitaguyod ang aming pamilya regardless kung nasa Pilipinas man kami o kung saan man.

Ang hilig ko sa pagtatrabaho ay likas na sa akin. Noong nasa university pa lamang ako ay hindi ako nahiyang magbenta ng mga damit sa aking mga classmates. Noon pa man ay na-develop ko na ang aking negotiating skills dahil nakipag-deal ako sa aking rich na classmate na may-ari ng RTW shop sa Guadalupe na humango sa kanila ng mga golf shirts sa murang halaga para ibenta. Bukod dito ay may part-time job pa ako bilang isang service crew sa Cindy’s Hamburger sa Quad area sa Makati. Minsan nga, nag-overtime ako sa Cindy’s to do graveyard shift para linisin ang restaurant mula hating gabi hanggang umaga. Habang naglilinis ako ay dumaan ang isang grupo ng mga rich kids na galing sa Rumors Disco. Pagtingin ko ay mga classmates ko pala. Nahiya ako nang husto. Later on in my life, nasabi ko sa aking sarili na ayos din ang mga katulad nitong karanasan dahil na develop nito sa akin ang hindi ikahiya ang anuman ang iyong ginagawang trabaho basta’t ito’y marangal.

Natatandaan ko rin na minsan akong naging singing telegram. Dahil sa may kaunti akong talent na kumanta ay na-hire ako sa isang telegram services na mag-deliver ng kanta. Hindi pa uso noon ang mga mobile apps for delivery services pero may ilan-ilan na rin ang gumagawa nito na bitbit ang aming mobile karaoke machine para kumanta kung saan man kami ma-request.

Isang payaso rin ako o clown host. Nagsimula ang aking gigs sa Bata-Batuta Productions at Libangang Pilipino Productions, Inc., ang tahanan ng Boyoyong Clowns kung saan doon din nagsimula si Jose Manalo. Noong kalaunan ay nagtayo ako ng sarili kong party services, which included clown hosting, balloons at table and chairs rental. Ito ang mga unang taon namin ni Misis na naging magkatuwang sa paghahanap-buhay.

Sa larangan ng party services ko nakilala si Ate Margot Esplana, na dating VIP dancer ni Vilma Santos. Doon naman ako rumaket ng hosting ng mga corporate events, debut at mga weddings.

Mayroon na akong full-time job sa city hall ng Taguig. Pero dahil bored ako sa nature ng work ay nag-decide akong mag-abroad. I ended up working in Doha, Qatar, doing an admin job and later on as a procurement person. Taga-bili. Lumipat ako from Qatar to Dubai doing the same profession.

Mula Dubai ay dumating na nga ang opportunity ng Canada. Pebrero 14, 2009, nang nagsimula na nga ang buhay Canada namin.

Speaking of trabaho, wala pang isang buwan mula ng dumating ako from Pinas ay nakasungkit na ako ng trabaho sa isang call centre. NRG Research sa Notre Dame Avenue. Survival job ika nga. Makalipas ang ilang linggo ay pinalad akong ma-hire ni Councillor Mike Pagtakhan bilang kaniyang Executive Assistant. However, I still kept my call centre job. Fast forward, ay na-hire na ako sa isang mas matatag na trabaho sa Manitoba Land Titles Office at sinuwerte rin na makakuha ng part-time job sa federal government. Hanggang ngayon, awa ng Diyos, ay nandito pa rin ako sa mga trabahong ito. On top of these regular jobs ay marami pa rin akong raket on the side tulad ng Kuya’s Foods at iba pa.

Napapagod ba ko? Oo. Pero gusto ko ang napapagod at pagiging busy. Kung hindi busy ang utak at katawan ko ay hindi normal ito para sa akin.

However, darating ang panahon na you will take a pause and think. Ganito ang nangyari sa akin in the last few months. Sabi ko kay Aldous, ang aking kaibigan. “Pre, magbabawas ako ng gagawin.” I will take a moment to think and assess kung ano talaga ang valuable na gawin ko pa at this point in my life. Kailangan ko pa bang magmadali at humataw nang husto tulad ng dati?

Positibong karakter ang maging masikap, masipag, at madiskarte sa buhay, lalo na kung gusto mo ito sa sarili at buhay mo. You reap what you sow. Ang pag-ani (harvest time) ay hindi madaling marating pero kung magtatanim ka ng sipag at tiyaga sa maagang bahagi ng iyong buhay ay makakamtam mo ito sa tamang panahon. May bunga ang lahat ng pagsisikap.

Sa kabilang dako, may panahon din para bigyan mo ng pagkakataon ang iyong sarili na tanungin kung ano ang priyoridad mo sa ngayon depende sa katatayuan ng iyong buhay. Sa hirap ng buhay ngayon ay marami sa atin ang todo pa rin ang paghataw, which is very good! Kailangan natin ito to survive. Pero kailangan din nating balansehin ang ating mga priorities.

Sa pagtawid natin from 2023 to 2024 ay pag-aralan natin ang ating sitwasyon. Hataw 2024 pa rin ba or kalma lang? Nasa ating mga sarili ang sagot. Walang maling sagot dahil depende ito sa ating mga estado sa buhay.

Maraming salamat sa patuloy ninyong pagsubaybay sa Batang North End column since 2009. Labing-apat na taon na tayong nagkukwentuhan. Ito ang isang gawain ko sa buhay na magpapatuloy hangga’t ako ay nakapag-iisip pa ng ibabahagi sa inyo.

Noel Lapuz ay dating OFW sa Middle East (Dubai at Qatar). Nagtrabaho nang sampung taon sa City Hall ng Taguig bilang Human Resource Management Officer. Naging bahagi ng Bata-Batuta Productions bilang manunulat, entertainment host at stage actor. Nagtatag ng Kulturang Alyansa ng Taguig. Kasapi ng Ecumenical Movement for Justice and Peace (EMJP).

Have a comment on this article? Send us your feedback