Published on

Cristy Per Minute ni Cristy FerminEnero 16-31, 2021

      Lani Misalucha
Lani Misalucha
  Ara Mina
 
Ara Mina
  Ara Mina2
 
Ara Mina & Dave Alamrinez
  BB Gandanghari
 
BB Gandanghari
  Rustom Padilla
 
Rustom Padilla
  Claudine Barretto
 
Claudine Barretto
  KC Concepcion Sharon Cuneta
 
KC Concepcion & Sharon Cuneta
  arnold.ali
 
Arnold Clavio & Ali Sotto
  Joem
 
Joem Bascon, Meryll Soriano, baby Jude Trevor, & Elijah Palanca
  Sharon beach
 
Sharon Cuneta
  Derek Ruffa Ellen1
 
Derek Ramsay, Ruffa Gutierrez
& Ellen Adarna
  Ellen Derek
 
Ellen Adarna & Derek Ramsay
  nat cristy 1
  nay cristy 2
  nay cristy 3

Lani Misalucha at asawang si Noli, may matinding pinagdaanan

Matindi ang pinagdaanan ng mag-asawang Noli at Lani Misalucha dalawang buwan na ang nakararaan. Mas matindi pa raw sa COVID-19 ang mikrobyong nagpahirap sa kanila.

Matindi ang naging epekto noon kay Lani. Binging-bingi ang kanan niyang tenga. Hindi pa rin balanse ang kaniyang katawan dahil sa madalas na pagkahilo. Pero ang pinagdaanang hirap ni Lani Misalucha ay hindi namin nakita nang mapanood namin siya noong nakaraang Linggo sa All Out Sundays.

Nakaupo lang siya at kinanta niya ang Bridge Over Troubled Water na pinasikat ng Simon & Garfunkel. Binago niya ang areglo ng piyesa.

Parang balewala lang sa kaniya ang pag-abot sa matataas na nota. Parang hindi man lang siya nahihirapan. Si Lani Misalucha lang ang makapagtatawid noon na parang hindi siya nanggaling sa pakikipaglaban sa iisa niyang buhay sa loob nang dalawang buwan.

Hindi binago ng pagkakasakit ang matining niyang boses. Ang masarap na hagod ng kaniyang atake maging sa pinakamatayog na tono. Mabait ang Diyos kay Lani Misalucha.

Totoo ang kaniyang sinabi, kung ang kaniyang boses na pinagkakabuhayan niya ang mawawala ay ano pa ang saysay ng mabuhay para sa kaniya. Pero hindi ‘yon ipinagkait sa kaniya ng kapalaran.

Ara Mina, maligaya, engaged na!

Nakakuwentuhan namin ang engaged nang si Ara Mina sa kaniyang boyfriend na si Dave Alamrinez noong isang gabi. Sa boses pa lang ni Ara ay tumatawid na sa amin ang kaniyang kaligayahan.

Pagkatapos nga naman ng kaniyang napakahabang biyahe sa pakikipagrelasyon na ang karamihan ay pagkabigo ang resulta ay heto at malapit na siyang ihatid sa altar ng lalaking dinisenyo para sa kaniya ng kapalaran.

Si Tita Rexy Tiangco, pareho naming kaibigan ni Ara, ang nagtulay sa aming kuwentuhan. Magkakasama sila nina Joy Lim at Teresa Loyzaga, regular silang nagkikita-kita, para sa kanilang mga kuwentuhan.

“Nagpaalam ako kay Ara kung puwede kong piktyuran ang singsing na ibinigay sa kaniya ni Dave noong mag-propose sa kaniya. Pumayag naman si Ara.

“Napakaganda ng ring, apat na karat ‘yon. White gold na may nakapalibot ding mga diamonds. Perfect ang bato, walang carbon, walang dumi. I should know, dahil alahera ako,” kuwento ni Tita Rexy.

Hindi pa masabi ni Ara kung kailan ang kasal nila ni Dave. Kahapon ay bumalik siya sa lock-in taping niya para sa Ang Probinsiyano. Paglabas daw niya sa lock-in ay saka pa lang sila mag-uusap at magpaplano ng kaniyang karelasyon.

Walang dudang kayang-kaya siyang bigyan ng magandang buhay ng kaniyang mapapangasawa, mula sa buena familia si Dave Almarinez, bukod pa sa pagiging undersecretary nito sa PITC.

“Talaga pong nagpapasalamat ako dahil heto na, natagpuan ko na ang taong magmamahal sa akin at mamahalin ko rin,” pahayag ni Ara.

Palagi namang ganoon. Sa bilyun-bilyong tao sa buong mundo ay palaging may nakalaang makakambal ang ating puso. Tadhana ang nagbibigay, kapalaran ang nagdidikta, tulad ng buhay-pag-ibig ni Ara Mina na dumaan sa napakahabang biyahe na pinagdaanan niya pero sa wakas ay dumating na ang kaniyang mapapangasawa.

Isa si Ara Mina sa iilang personalidad na mahal ng mga manunulat dahil alam niya ang pinasok niyang mundo. Hindi siya nagtatanim ng galit sa mga reporter na pumipitik sa kaniya.

Marespeto siya sa aming propesyon. Nananatili ang paggalang niya sa mga manunulat na alam niyang malaking bahagi ng popularidad na niyayakap niya ngayon.

BB Gandanghari, humingi ng tawad sa lahat ng nasaktan niya

Sino ba naman tayo para hindi magpatawad? Napakagasgas na ng kasabihan, pero totoong-totoo. Kung ang Diyos nga ay nagpapatawad tayo pa kaya?

Sa pinakahuling vlog ni Rustom Padilla a.k.a. BB Gandanghari ay humingi siya ng tawad sa mga taong aminado siyang nasaktan niya noong nakaraang taon.

Tatlo ang kaniyang binanggit: ang kaniyang kapatid na si Robin Padilla, si Manay Lolit Solis at ang inyong kolumnista. Sinsero ang pagkakasabi niya kay Princess Punzalan na kasama niya sa vlog na pinagsisisihan niya ang mga salitang ibinato niya laban sa aming tatlo nina Robin at Manay Lolit.

Hindi na namin kailangan pang idetalye kung gaano kasakit ang mga salitang ipinakain niya laban sa amin. Ang mahalaga ay nagsisisi na siya. Ginamot na ng panahon ang kaniyang emosyon. Matindi talagang maging guro ang karanasan. Una muna tayong bibigyan ng pagsusulit at pagkatapos noon ay ang leksiyon.

Sa totoo lang, sa kabila ng naganap ay hindi kami nagtanim ng galit kay Rustom Padilla. Ang totoo ay awang-awa pa nga kami sa kaniya dahil parang napakalawak ng mundo para mahanap niya ang kaniyang sarili.

Kalungkutan ang kaniyang kalaban. Pagmamahal ng sarili niyang pamilya ang kaniyang hinahanap. Pasasaan ba’t isang araw ay magkikita rin sila sa gitna ng kaniyang pamilya. Miyembro siya ng pamilya. Imposibleng hindi lumambot ang puso ni Mommy Eva Cariño at ng kaniyang mga kapatid para sa kaniya. Kumunikasyon lang ang kulang sa magkabilang panig.

Kapag walang pag-uusap ay walang relasyon. Kapag walang respeto ay walang pagmamahal. At kapag walang pagtitiwala ay walang pag-ibig.

Harinawang matulayan na ang kanilang relasyon. Matibag na sana ang pader sa kanilang pagitan. Matanggap na sana ng pamilya ni Rustom Padilla ang kaniyang pagpapakatotoo dahil doon siya maligaya.

Claudine Barretto, magbabalik-pelikula na

Mukhang matutuloy na ang pagbabalik-pelikula ni Claudine Barretto. Binabalangkas na ngayon ng produksiyon ni Attorney Ferdie Topacio ang lahat ng aspekto para sa pagbibidahang proyekto ng aktres.

Kinakausap na nila ang direktor na hahawak kay Claudine, ang magaling na scriptwriter na si Eric Ramos ang maglalatag ng istorya. Maging ang mga makakasamang artista ay inaayos na rin ng produksiyon.

Sabi ng magaling na abogado, “Sayang kasi ang talent ni Claudine kung hindi niya nagagamit. Sa maigsing role niya sa Mamasapano, marami siyang pinahanga.

“Wala pa ring kupas ang talent niya, magaling pa rin siyang umarte, nakapanghihinayang ‘yon kundi niya mailalabas,” papuri ni Attorney Topacio sa kaniyang kliyente.

At panahon na talaga para muling humarap sa mga camera si Claudine Barretto. Tama ang sinabi ng kaniyang abogado; nakapanghihinayang hindi lang ang kaniyang husay sa pagganap, kundi pati ang panahong lumilipas na wala siyang ginagawang proyekto.

Seryosohin lang ni Claudine ang kaniyang karera ay hindi na siya mahihirapang makabalik. Nandiyan pa rin ang kaniyang mga tagahangang sumusuporta sa kaniya. Magandang istorya lang ang kailangan para sa pagbabalik niya.

Hindi kumukupas ang kaniyang ganda. Malaki na rin ang ibinagsak ng kaniyang timbang. Sayang na sayang talaga ang panahong lumilipas na pinababayaan niya.

Sharon Cuneta at KC Concepcion, wala nang mahihiling pa

Ito na ang hudyat ng mas magandang samahan ng mag-inang Sharon Cuneta at KC Concepcion. Kung pinaglayo man sila noong nakaraang taon ay bawing-bawi naman ngayon ang mga panahong nawala sa kanilang mag-ina.

Nagsimula ang lahat noong nakaraang Noche Buena. Dumating si KC sa bahay ng kaniyang ina. Walang tanungan at sumbatan. Mayroon nga namang tamang pagkakataon para sa ganoon. Masaya nilang ipinagdiwang ang Pasko.

Noong nakaraang taon, nang bigyan ng selebrasyon ng kaniyang kaarawan si Sharon sa ASAP Natin ‘To ay hindi malilimutan ng manonood ang kaniyang sinabi na dapat ay apat ang mga anak niyang nandoon, pero sina Kakie, Miel at Miguel lang ang kaniyang katabi.

Hindi naging maayos ang lahat sa kanila ni KC noong nakaraang taon. Maraming kuwentong lumabas. Maraming nakisimpatya sa Megastar. Pero bumabawi si KC. Sunud-sunod na pagbawi dahil mula sa El Nido kung saan ito nagbakasyon ay bumalik lang muna ang dalaga sa Manila, pero bumiyahe uli papuntang Amanpulo kung nasaan ang pamilya ng Megastar.

Eport kung eport, di ba naman, na tunay na ikinaligaya ni Sharon dahil kumpleto na naman ang kaniyang pamilya. Para sa isang tulad niya na mayroon na ng lahat ng materyal na bagay sa mundo ay ‘yon na ang pinakamahalaga.

Napakaraming maligaya para sa mag-ina. Ang punto nga naman ng reyalisasyon ay hindi nawawala sa ating puso. Anuman ang mangyari ay dugo pa rin ang magtatagumpay. Wala nang mahihiling pa ngayon si Sharon Cuneta. Walang-wala na. Kumpleto na siya.

Ali Sotto, nag-resign na sa programang Dobol A sa Dobol B

Pinagpipistahan ngayon ng kuwentong-sibuyas hindi lang dahil sa sobrang taas ng presyo nito ngayon kundi dahil sa lumabas na kuwentong sibuyas ang dahilan kung bakit hindi na magkasama ngayon sa programang Dobol A Sa Dobol B sina Ali Sotto at Arnold Clavio.

Ibinato ni Mr. Fu sa digital show namin nina Manay Lolit Solis na Take It, Per Minute… Me Gano’n ang istorya sa pamamagitan ng blind item.

Marami kasing nagtatanong kung bakit wala na sa programa ang singer-actress na si Ali. May nagkuwento na ang makasaysayang sibuyas ang naging dahilan noon. Nakakaaliw ang kuwento.

May nagregalo raw kasi ng isang sakong sibuyas kay Ali habang nagraradyo siya. Pinakiusapan daw ni Ali ang PA nila sa radyo na pakikuha ang sibuyas sa gate ng GMA-7, dahil nakaere nga sila ni Igan Arnold Clavio.

Hindi raw ‘yun nagustuhan ng isang ehekutibo ng radio. Hindi raw dapat inuutusan ang kanilang PA para sa mga personal na kapakanan, kaya nagkasagutan daw si Ali at ang kanilang tagapamahala. Para lumamig daw ang sitwasyon ay pinagbakasyon muna si Ali sa kanilang programa ni Arnold.

Pero hindi na bumalik pa si Ali Sotto. Itinuluy-tuloy na niya ang pagbabakasyon, ayon pa sa blind item na pinangalanan din ni Manay Lolit sa bandang huli.

Pero hindi raw naman ang nananahimik na sibuyas ang dahilan ng pagbitiw ni Ali sa programa. May mas malalim pang dahilan na ayaw na lang niyang sabihin pa para tapos na ang isyu.

Ang sibuyas… bow!

Joem Bascon, bina-bash dahil sa pakikipagbalikan kay Meryll

Nakakalalaki ang pamba-bash kay Joem Bascon na kaya lang niya binalikan si Meryll Soriano ay dahil sa pagiging heredera nito ng kaniyang amang si Willie Revillame.

Panganay na anak ni Willie si Meme, matagal nang sinasabi ni Willie na lahat ng kaniyang mga ginagawang pagsasakripisyo at pagpupundar ng mga ari-arian ay hindi na para sa kaniya kundi para sa mga anak nitong maiiwan, nagpapakatotoo lang ang TV host.

“Lahat ng mayroon tayo ngayon, sa isang iglap lang, e, mawawala ring lahat. Hindi naman natin madadala lahat ‘yan kapag nawala tayo.

“Tapos na ako para sa sarili ko, para sa mga anak ko na lang ang pinaghahandaan ko,” madalas sabihin ni Willie.

Apat na anak na may iba-ibang ina ang tinutukoy ni Willie, si Meryll ang panganay. Pantay-pantay ang tingin sa kanila ng TV host.

Kung mahina-hina lang ang control at may kaigsian ang pasensiya ni Joem Bascon ay siguradong papatulan niya ang mga salitang ipinupukol sa kaniya ngayon ng mga taong masayang-masaya kapag nakakapanakit ng kanilang kapuwa.

Ang mamanahin lang daw ni Meryll kay Willie ang kaniyang habol. ‘Yun lang daw ang inaasinta ng aktor kaya niya binalikan si Meme.

Kung ang dati nga raw niyang karelasyon nang walong taon ay iniwan niya, si Meryll pa kaya ang hindi makaranas ng ganoon, dagdag na salita pa ng mga bashers.

Nakakaawa naman si Joem Bascon. Kahit pa itaya na niya ang kaniyang buhay para mabigyan niya ng magandang buhay si Meryll at ang kanilang anak ay mamaliitin lang ng mga bashers, dahil ang naglalaro nga sa kanilang anak ay ang pinag-iinteresan diumanong kayamanan na mamamana ni Meryll mula sa kaniyang ama.

Nakakalalaki nga naman ‘yun.

Sharon Cuneta, matindi ang sakripisyo at disiplina

Matinding sakripisyo at disiplina ang pinagdaanan ni Sharon Cuneta bago lumabas ang kaniyang mga retratong naka-swimwear na nakadapa sa may dalampasigan ng Amanpulo.

Malaki ang timbang na nawala sa Megastar. Kitang-kita ang kaniyang kurbada habang naglulunoy sa dagat. Komento nga ng iba ay mas malaki pang tingnan ngayon si KC Concepcion kaysa sa kaniya.

Damay si Angel Locsin sa senaryo, kung ang singkuwenta’y singko anyos na nga raw na si Sharon ay nagtagumpay, bakit hindi rin ‘yun pangarapin ni Angel?

Sabi pa ng isang usisero, “Napanood ko si Angel sa show niyang Iba ‘Yan, nakakaloka ang itsura niya! Para na siyang nanganak nang apat na beses sa katabaan niya!”

Nabasa ‘yun ng isa naming kaibigan. Sinadya nitong abangan ang programa ni Angel, saka ito nagbigay ng konklusyon. May punto raw ang basher ng magandang aktres.

Sabi nito, “Talagang hinintay ko ang show ni Angel. Napanood ko ‘yung episode na may mga kasama siyang matatandang inaalagaan sa isang orphanage.

“Totoo nga! Napakalaki ni Angel. Kahit anong paglalaro ang gawin ng cameraman sa mga shots niya, e, talagang super-taba nga siya! Walang anggulong payat siyang tingnan.

“Tama ang opinion ng mga bashers na kung nagawa nga ni Sharon ang magpapayat sa age niya na di hamak na mas bata si Angel, e, bakit hindi rin niya magawang mag-diet?” opinyon ng aming kausap.

Madisiplina si Angel Locsin. Kahit sa kaniyang karera ay maalaga siya. Napakapropesyonal niya. Isang senyal na kayang-kaya rin niyang magbawas ng timbang.

Pero hindi ‘yun magagawa nang mabilisan ni Angel. Mayroon siyang problema sa kaniyang sistema. Mas mahalagang ligtas siya kaysa sa pumayat.

“Pero napakaganda talaga ni Angel. Iba ang beauty niya. Walang anggulo! Mataba man siya, e, bawing-bawi naman ‘yun sa kagandahan niya!” pagbawi ng kaibigan naming manghang-mangha sa timbang ngayon ni Angel Locsin.

Totoong-totoo.

Derek Ramsay at Ellen Adarna, bina-bash ngayon

Bina-bash ngayon sina Derek Ramsay at Ellen Adarna. Walang alam ang mga bashers sa kuwento kung bakit sila nagkasama.

Nagpa-dinner sa kaniyang mansiyon si Derek, nandoon din ang kaniyang bestfriend na si John Estrada, saka ang dalawa niyang kapitbahay sa Atala Alabang na sina Ellen Adarna at Ruffa Gutierrez.

Lumabas ang mga video. Naghaharutan sina Derek at Ellen Adarna. Wala namang malisyang paghaharutan ‘yun pero ibinase ng mga bashers ang kanilang mga bira sa lumabas na video.

Masasakit ang mga salitang ibinato laban kina Derek at Ellen. Bagay na bagay raw sila dahil parang nilalaro lang nila ang pag-ibig. Kahihiwalay lang nina Derek at Andrea Torres at sina Ellen at John Lloyd Cruz.

Maiiwasan dapat ang bashing kung walang lumabas na video ng paghaharutan-pagbibiruan nina Derek at Ellen Adarna. Sinisisi ngayon ng mga tagasuporta nina Derek at Ellen ang naglabas ng mga video.

Pero nilinaw naman ni Ruffa na walang malisya ang paglalapit nina Derek at Ellen. Pero hindi ‘yun pinansin ng mga bashers. Agaran na nilang hinusgahan sina Derek at Ellen sa kanilang nakita-napanood.

Sa halip na sina John Estrada at Ellen ang maugnay dahil mayroon silang pagtatambalang sitcom sa TV5 ay nasentro ang kuwento kina Derek at Ellen.

Sa panahong ito ng social media ay wala nang ligtas. Nasa mundo na tayo ng digital. Napakabilis humusga ng mga bashers kahit hindi naman nila alam ang puno at dulo ng istorya.

Kaya ang pinakaligtas na paraan para walang maganap na bashing, huwag magpakita ng kahit ano. Sarilinin na lang ng mga personalidad ang mga nagananap kapag magkakasama sila.