Published on

Cristy Per Minute ni Cristy FerminAbril 16-30, 2021

      Alice Dixson
Alice Dixson
  derek ellen austin elie
 
Ellen Adarna, her son Elias, Derek Ramsay & his son Austin
  Bea Alonzo
 
Bea Alonzo
  Julia Barretto
 
Julia Barretta
  Jessy Mendiola Louis Manzano
 
Jessy Mendiola & Louis Manzano
  Maja Salvador
 
Maja Salvador
  Ara Mina Dave Almarinez
 
Ara Mina Dave Almarinez
  Sharon Cuneta her mansion
 
Sharon Cuneta & her mansion
  Willie Revillame
 
Willie Revillame
  Ted Failon
 
Ted Failon
  Cheryl Cosim
 
Cheryl Cosim
  Raffy Tulfo
 
Raffy Tulfo
  Dennis Padilla
 
Dennis Padilla
  Joseph Estrada
 
Joseph Estrada

Alice Dixson – Mayroon nang munting anghel

Kumpleto na ang kaligayahan ngayon ni Alice Dixson. Sa pinakamahabang panahon ay ang hindi niya pagkakaroon ng anak ang isang tanong na gustung-gustong ibato sa kaniya ng marami pero mas nangingibabaw ang pagrespeto sa kaniyang pagkababae.

Ilang dekada silang tumira sa Vancouver ng kaniyang dating asawang si Ronnie, pero hindi sila nagkaanak, ilang taon na ang nakararaan at nagdesisyon na silang magdiborsiyo.

Sa ngayon ay maligaya na ang aktres sa piling ng kaniyang bagong karelasyon, sa Boracay ito naninirahan, kaya madalas magpunta doon si Alice.

Masayang ibinalita ni Alice na mayroon na silang munting anghel, hindi sa kaniyang sinapupunan nagmula ang sanggol, pero ang binhi ay mula sa kanila ng kaniyang karelasyon.

Ilang beses na nagpabalik-balik sa Amerika si Alice, ang pinakahuli ay nang manganak na ang nagdalantao para sa kanilang anak, ilang buwan pa kapag maayos na ang estado ng pagbibiyahe ay uuwi na sila ng kaniyang anak.

Masuwerteng bata dahil doon pa man ay napakahilig na ni Alice sa pagtulong sa mga bahay-ampunan. Nagpapa-celebrity bowling games pa siya para ang lahat ng kikitain ay ihahandog niya sa orphanage na inaayudahan niya.

Anak na lang ang kulang para makumpleto ang kaligayahan ni Alice, anak na ipinagkait sa kaniya nang matagal na panahon, pero sa tulong ng siyensiya ay isang ina na siya ngayon.

Sa mga nag-uusisa kung ang hindi ba niya pagkakaroon ng anak ang naging dahilan ng paghihiwalay nila ng kaniyang mister ay isa lang iyon sa mga puwedeng iturong senaryo.

Bukod doon ay mayroon pang mga naging dahilan para mauwi sa hiwalayan na ang kanilang pagsasama. Hindi sila nagkakasundo sa maraming bagay.

Sa mga espesyal na okasyon tulad ng reunion ng pamilya nina Alice ay hindi sumasama si Ronnie, nagiging dahilan iyon ng kanilang matinding tampuhan, dahil malayo ang loob ng mister niya sa kaniyang pamilya.

Minsan ay tinanong si Alice ng isang madaldal niyang pamangkin, “Tita, are you married?” Oo naman, sabi niya sa bata, kaya ang sumunod na tanong nito, “If you’re married, how come we haven’t seen your husband? How come you’re always alone?”

At maraming-marami pang kuwento na gusto nang ilibing ng magandang aktres sa nakaraan dahil maligaya na siya ngayon.

Derek Ramsay – Fake dad ayon sa mga bashers

Ayaw talagang tantanan ng mga bashers ang relasyon nina Derek Ramsay at Ellen Adarna. Bawat kilos nila ay kinikilatis ng mga bashers, pinakakain sila ng mapait na ampalaya, hindi sila binibigyan ng katahimikan.

May limitasyon ang pagpapasensiya at pagtitiis, kaya kapag sumosobra na ang komento ng mga bashers na nagbabantay sa kanilang mga posts, sumasagot na rin si Derek.

At sumasagot din si Ellen, walang pakialam ang sexy actress sa mga bashers, kung ano ang masasakit na salitang ibinabato laban sa kanila ni Derek, ganoon din ang ibinabalik ng babae.

Fake daddy ang ibinigay na bagong posisyon ng mga bashers kay Derek. Pekeng tatay para kay Elias Modesto na anak ng kaniyang girlfriend kay John Lloyd Cruz.

Sa halip na pahalagahan ang pagmamahal at malasakit ng aktor sa anak ng kaniyang karelasyon ay minasama pa ng mga bashers ang mga ipinakikita ni Derek.

Ano ba ang hiling ng bawat babaeng may anak na pero gusto pa ring pumasok sa isang relasyon? Walang iba kundi ang sana’y mahalin at tanggapin din ng lalaki hindi lang siya kundi pati ang kaniyang anak sa iba.

At iyon ang ginagawa ngayon ni Derek kay Elias, hindi lang natin alam kung ano ang pribado nilang pag-uusap ni Ellen, pero siguradong kasama sa relasyon nila ang pagmamahal na dapat ibigay ni Derek sa anak nila ni John Lloyd.

At hindi nakikipagkumpetensiya si Derek kay JLC. Alam niya kung ano ang kaniyang posisyon kay Elias. At ang kaniyang anak na isinusumbat sa kaniya na si Austin ay mahal na mahal ni Derek.

At mahal din ni Ellen ang binatilyo. Alagang-alaga ni Derek si Austin, pinag-aaral sa magagandang eskuwelahan, hinding-hindi niya ito pababayaan.

Maging masaya na lang sana tayo sa magandang pagtratong ibinibigay ni Derek kay Elias. Sa sasandaling panahon ay napalapit na rin sa kaniya ang kalooban ng bata, ibig sabihi’y ramdam ni Elias ang sinserong pagmamahal ng aktor, dahil mahirap lokohin ang bata pagdating sa emosyon.

Walang fake daddy. Basta nararamdaman ng kahit sinong bata ang tunay na pagmamahal sa kaniya ay tunay iyon. Hindi paimbabaw.

Bea Alonzo – Paboritong paksa ng mga tibo

Paboritong paksa ng mga tibo si Bea Alonzo. May kaibigan kaming tunggril na yata noong ipanganak na ang kaisa-isang pangarap lang ay ang makilala nang personal ang magandang aktres.

Wala itong pakialam sa ibang artista, si Bea Alonzo lang talaga ang type na type ng kaibigan naming miyembro ng Tung dynasty, bakit nga ba?

Diretso nitong komento, “There’s something in her na ang sarap matuklasan. Sobrang mysterious ang dating niya sa akin. Sa aming lahat ng mga katropa ko.

“Sa kaniya lang kami interesado, wala kaming pakialam sa mga naggagandahan at nagseseksihang artista d’yan! Team Bea Alonzo lang kami,” seryosong paliwanag ng aming kaibigan.

Matagal nang umiikot ang kuwentong nakapagdududa rin ang kasarian ng magandang aktres. Hindi siya galawgaw, babaeng-babae ang kaniyang dating, pero bakit nga ba napapabalitang tibo rin ang pagkaganda-gandang aktres?

Kunsabagay, mayroon ding mga babaeng sakdal-hinhin kung tingnan, pero hati ang kanilang puso sa pakikipagrelasyon. Puwede sila sa lalaki at puwede rin sa kapuwa babae.

Pero ang ganda-ganda ng paglalarawan ng kaibigan naming propesor kay Bea, “Para kasi siyang alak. Habang tumatagal, lalong sumasarap. Ang mga kakontemporaryo niya, e, nangawala na, pero si Bea, heto pa rin at nagsasalita ang presensiya!

“Bihira lang ang babaeng mas lumalakas ang sex appeal kapag nagkakaedad na. Isa si Bea doon. Kaya tanungin mo ang kahit sinong young actor ngayon kung sino ang type niya.

“Bea Alonzo lang ang sagot. Maganda kasi siyang magdala. Kakaiba ang dating niya. Tama, may pagkamisteryosa siya,” kumpletong pahayag ni prop.

Totoo namang napakagandang ehemplo ni Bea Alonzo sa kaniyang mga kapuwa artista. Habang kumikita ay matutong mag-impok, kailangang maging malayuan ang kanilang tingin, dahil wala namang kasiguruhan ang kanilang trabaho.

Ngayon ay mabentang-mabenta sila sa dami ng proyekto, pero dumarating ang panahong naiinip na sila sa paghahanap ng trabaho, dahil may mga bago nang pumalit sa kanila.

Bea Alonzo at Julia Barretto – Posibleng maging magkaibigan

Komento ng isang kaibigang nakausap namin, isang araw daw ay hindi malayong maging magkaibigan pa nga sina Bea Alonzo at Julia Barretto, kapag nauntog na sa katotohanan ang mas nakababatang aktres.

Parang lumundag na nang malayo ang aming kausap, parang sa isip nito ay hindi rin magtatagal ang relasyon nina Julia at Gerald Anderson, kaya kapag naganap iyon ay magiging magkaibigan pa ang dalawang babaeng nag-aagawan ngayon sa aktor.

Kunsabagay, naging magkaibigan din sina Kim Chiu at Maja Salvador na dating pinagsasabong dahil kay Gerald Anderson.

Kailangan namin ng paliwanag sa komento, kaya ang sabi ng aming kausap, “Sa age niya ngayon, e, hindi pa stable ang pakikipagrelasyon ni Gerald. Hindi pa siya ganoon katatag. Anything can happen.

“Kung babalikan natin, halos lahat ng nakaka-partner niya, e, nagiging girlfriend niya. Madali siyang matukso. Isa siyang mapusok, marupok, po – ok!

“Kapag naipit na siya, e, wala naman siyang inaamin. Tama si Bea, he’s so selfish! Huwag naman sana, pero baka ganoon din ang mangyari kay Julia,” komento ng aming kaibigan.

Iba naman ang aming pananaw. Bawat tao, lalo na sa aspeto ng pakikipagrelasyon, ay mayroong nakakatapat. Maaaring hindi maganda ang kartada ng mga nakaraan niyang karelasyon, naging magulo, pero may matatagpuan siyang babaeng mamahalin niya nang sobra pa sa kaniyang sarili.

Puwedeng mangyari ang ganoon kina Gerald at Julia, lalo na’t pareho nilang ipinaglaban ang kanilang relasyon, paninindigan nila iyon hanggang sa huli.

Puwedeng si Julia na nga ang katapat ni Gerald, na pukulin man siya ng mga negatibong salita ay sasaluhin lang nila, pero ipupukol din nila sa hangin.

At harinawang sila na nga ang magkatapat, huwag na sanang madarang pa sa ibang babae si Gerald, dahil kapag nangyari iyon ay isisigaw ni Bea ang pinakamalakas nitong halakhak.

Magpakatibay na sana si Gerald sa relasyon nila ni Julia, sobra-sobrang akusasyon na ang ibinabato laban sa kaniya, baguhin niya na sana ang imahe niya.

Iyon lang ang dapat niyang panindigan.

Luis Manzano at Jessy Mendiola – Mr. & Mrs. na!

Maraming mapuputulan ng daliri, madadagdagan ang mga miyembro ng Yakuza, dahil tapos na ang civil wedding nina Luis Manzano at Jessy Mendiola noong February 21 pa.

Mabilisan ang kanilang preparasyon, sa Disyembre pa dapat gaganapin ang kanilang kasal sa Palawan, pero nagdesisyon silang magpakasal na sa The Farm sa San Benito, Batangas.

Mga miyembro lang ng kanilang pamilya ang dumalo at ilang piling-piling kaibigan, dalawampu lang ang bilang, nagmistula silang nunal sa napakalawak na garden ng The Farm.

Noong mag-propose si Luis kay Jessy ay nagsalimbayan ang mga agam-agam. Hanggang doon lang daw iyon, walang kasalan, ampaw raw ang proposal.

Pero pinatunayan nina Luis at Jessy na kapag gusto ay makagagawa sila ng paraan. Hindi na nila kailangang ipaghintay pa sa Disyembre ang kanilang kasal kung puwede namang mas agahan.

Siyempre’y nandoon sina Edu Manzano at Congresswoman Vilma Santos na matagal nang humihingi ng apo kina Luis at Jessy. Kumpleto rin ang pamilya ng aktres na tanggap na tanggap na si Luis sa kanilang pamilya.

Habang lumalakad si Jessy palapit sa ginawang altar ay umiiyak si Luis, ganoon din ang ina ni Jessy, sa tindi nga naman ng mga pinagdaanang isyu nina Luis at Jessy ay naisakatuparan pa rin nila ang pag-iisang-dibdib nang mabilisan.

Anak na ang hinihintay ng bayan ngayon, siguro raw ay nagdadalantao na si Jessy sa gaganapin nilang mas malaking kasalan sa Amanpulo, nagdadalantao man o hindi pa ito ay magandang bride si Jessy.

Paano na ngayon ang mga nakipagpustahan ng putulan ng daliri na hindi matutuloy ang kasalang Luis-Jessy? Paano na ang mga nagsabing hanggang sa proposal lang iyon at walang kasalang magaganap?

Mister and misis na sila ngayon!

Maja Salvador – Hindi matatawaran ang pagganap

Unti-unti nang niyayakap ng ating mga kababayan ang seryeng Nina Nino na pinagbibidahan ni Maja Salvador at ng baguhang aktor na si Noel Comia, Jr.

May bala ang tirador ng produksiyon, ang Cignal Entertainment, TV5 at ng CS Studios kakambal ang Spring Films nina Piolo Pascual at Direk Joyce Bernal at Erickson Raymundo ng Corner Stone.

Mapuso ang serye, hindi matatawaran ang pagganap ni Maja, idagdag pa ang galing sa pagganap ng beteranang aktres na si Ruby Ruiz. Napakalaki ng inilusog ng katawan ng dating child star na si Lilet Jodloman-Esteban pero nagsasalita pa rin ang kagandahan nito.

Dahil sa kahirapan ay magnanakaw ang ginagampanang papel nina Nina at Nino, nagtitinda rin sila ng mga kandilang may iba’t ibang kulay, hanggang sa uminit na ang kanilang pangalan sa mga barangay.

Sa episode bukas ng Nina Nino ay mukhang papasok na sa eksena ang magaling na komedyanteng si Empoy. Mas magiging interesante na ang kuwento, papasok na ang mga magaganap na himala, kaabang-abang ang seryeng ito.

Sa anunsiyo ng TV5 ay ang serye nina Gerald Anderson at Yam Concepcion ang papalit, ang Init Sa Magdamag, tingnan natin kung anong grado ang ibibigay ng publiko sa kanilang palabas.

Ara Mina – Postponed muna ang kasal

Habang sinusulat namin ang kolum na ito ay nakarating sa amin ang impormasyon na hindi na matutuloy ang pagpapakasal nina Dave Almarinez at Ara Mina sa April 28 na gaganapin dapat sa Baguio.

Iyon pala ang dahilan kung bakit nagtatanungan ang mga magnininong at magnininang sa kanila kung matutuloy pa ba ang kasal dahil ni motif ng kanilang kasalan ay hindi nila alam.

Ayon sa aming source, “Postponed muna ang kasal. Nag-aalala sila sa mga nangyayari ngayon, pataas nang pataas ang nagkakaroon ng virus. Baka raw magkaroon ng hawahan kapag itinutuloy nila ang kasal.”

Pandemya ang ibinigay na dahilan nina Dave at Ara, na tama lang naman, ipagpapahintay raw muna nilang maging maayos ang sitwasyon bago nila ituloy ang kanilang pagpapakasal.

Tanong ng aming source, “Parang may kababawan ang reason nila! Bakit sina Luis Manzano at Jessy Mendiola, e, nakapagpakasal naman kahit sa gitna ng pandemya.

“Kung ang pag-ayos ng sitwasyon ang hihintayin nila, e, kailan pa iyon? Mismong mga dalubhasang doktor na ang nagdedeklara na hindi pa magiging safe ang bayan natin sa COVID-19 in five years?

“Iyon ba ang hihintayin nila? Five years or more pa? Parang hindi iyon ang tunay na dahilan,” tanong-opinyon ng aming kausap.

Baka naman bago dumating ang petsang April 28 ay magdesisyon pa ring ituloy nina Dave at Ara ang kanilang kasal para huwag na silang pagdudahan pa.

Kung ayos na ang kanilang mga dokumento, kung nakahanda na ang lahat-lahat ng kailangan ay puwede pa rin naman silang magpakasal, lalo na’t hindi naman sakop ng ECQ ang Baguio at hanggang sa April 11 lang naman ang sakop ng bagong kauutusan?

Hintayin na lang natin ang susunod na kabanata sa kasalang Dave Almarinez-Ara Mina. Marami pang maaaring maganap sa pagitan ng petsa ngayon at sa April 28 na itinakda nilang araw ng kanilang paghaharap sa altar.

Sharon Cuneta – Nagpapatayo ng malaking mansiyon

Pinamangha ng Megastar ang ating mga kababayan nang lumabas ang animation video ng ipinatatayo niyang mansiyon. Parang Malacañang daw ang peg ng mansiyon, bagay na bagay sa isang Sharon Cuneta, grabe lang ang nasabi ng lahat ng nakapanood sa kaniyang IG.

Iyon ang mansiyon na unang tinutukan ang pundasyon, mahabang panahon ang kinain ng paghuhukay, para ligtas sa lindol ang buong gusali.

Si Conrad Onglao na karelasyon ni Zsa-Zsa Padilla ang kaniyang arkitekto, parang tatlong gusali iyon na pinagdugtung-dugtong, may sariling wing si Sharon kung saan niya ilalagay ang mahahalagang kagamitan niya na hanggang ngayo’y maingat niyang itinatabi.

At napakasuwerte ng mga alagang aso nina Senador Kiko at Sharon dahil kasali ang mga ito sa “housing project” ng mag-asawa. Mayroon silang sariling bahay na naka-aircon, mayroon din silang swimming pool, kaya ang komento ng mga kababayan natin – sana all.

Madalas naming sabihin na kapag mapagmahal sa mga hayup ang tao ay mas kaya niyang magmahal ng kaniyang kapuwa. Hindi na namin pakahahabaan pa ang paliwanag pero iyon si Sharon Cuneta, tinatrato niyang tao ang mga alaga nilang aso, at iyon ang nagpapatunay kung ano siya bilang tao.

Willie Revillame – Tuloy-tuloy lang ang show

Sobrang masunurin si Willie Revillame sa mga health protocols. Kunsabagay, kahit naman wala pang pandemya ay sobrang linis na niya sa bahay, organisado ang aktor-TV host sa lahat ng bagay.

Nagbawas siya ng mga dancers sa Wowowin-Tutok To Win. Napansin niya na ang dami-dami na nila sa studio kapag umeere ang kaniyang programa. Relyebo rin ang pagtatrabaho ng kaniyang production staff. Hindi puwedeng sabay-sabay bilang pagpapahalaga sa social distancing.

Masakit man sa kaniyang loob dahil kinasanayan na niya ay mag-isa na lang siyang kumakain ngayon, hindi na niya kasabay ang kaniyang staff, dahil sa isang pag-aaral ay napatunayan na mas malakas pala ang hawahan kapag grupo-grupo ang nasa hapag.

Hinihintay na lang ni Willie ang go signal ng pamunuan ng GMA-7 para sa plano niyang pagso-show sa kaniyang beach house sa Puerto Galera. Iyong para silang naka-bubble. Hindi na sila aalis sa lugar kapag nandoon na silang lahat.

Gusto rin niya kasing makumusta at maayudahan ang mga katutubo, milyong halaga ng bigas ang ipinabili niya, doon na sila bumili sa Mindoro para kumita naman ang mga tagaroon.

“Walang katiyakan ang buhay natin ngayon. Napakaraming naghihirap dahil nawalan ng trabaho. Ang basic needs nila, hindi pa rin nila nairaraos, paano na ang pambili nila ng gamot?

“Kapag nagbibigay ako ng ayuda sa show, kapag naririnig ko na ang pag-iyak ng tinawagan ko sa kabilang linya, nawawasak na ang puso ko. Hindi na ako makapagsalita.

“Mahirap na nga sila, nagpandemya pa, paano nga naman nila iraraos ang ganito kahirap na sitwasyon? Haaay! Kung kaya ko lang silang tulungang lahat,” pabuntong-hiningang pahayag ng mapusong TV host.

Sana nga ay dumami pa ang lahi ni Willie Revillame na hindi sinasarili lang ang mga biyayang tinatanggap niya. Ibinabahagi niya iyon sa mga walang-wala sa buhay.

“Realate na relate ako sa kanila. Alam ko ang pinagdadaanan nila ngayon. Alam ko ang maging mahirap. Saan ba naman ako nanggaling? Iyong mga kuwentong naririnig ko sa mga tinatawagan ko, nagdaan din ako sa ganoon.

“Sinuwerte lang ako. Nagsipag lang ako, hindi lang ako sumuko. Kung bumitiw ako noon, isa na rin ako sa mga humihingi ng ayuda ngayon,” makabuluhang sabi pa ni Willie Revillame.

Ted Failon – Nag-quarantine dahil sa COVID-19

Sa buong panahon ng pagku-quarantine ng magaling na news anchor na si Ted Failon dahil sa COVID-19 ay tinutukan namin ang kaniyang kalagayan.

Hinding-hindi na malilimutan pa ni Ted ang kaniyang kaarawan sa taong ito, iyon ang pagkakataong sa halip na magsaya ay naligalig ang kanilang buong pamilya, dahil nagpositibo siya sa virus.

Araw-araw kaming magka-text mula pa noon, pero iba ang naganap nang wala naman siyang nararamdaman, pero positibo ang resulta ng kaniyang swab test.

Asymptomatic si Ted, hindi siya nawalan ng panlasa, wala siyang ubo at sipon at anumang masakit sa kaniyang buong katawan, pero hindi nga pala sapat ang ganoon lang, dumaan pa rin siya sa masusing quarantine para sa kaniyang kaligtasan at ng kaniyang mga anak at apo.

Sabi niya noong unang araw ng kaniyang quarantine, “Imagine, shock na shock ako, wala akong anumang naramdamang iba sa health ko, pero positive pala ako. What a way to celebrate my birthday!”

Agarang sumailalim sa swab test ang kaniyang pamilya at mga kasambahay, masaya siya sa naging resulta, wala siyang dapat ipag-alala dahil negatibo ang mga ito.

Sa kaniyang pag-iisa ay maraming reyalisasyon ang kaniyang naengkuwentro. Madasalin si Ted, matindi ang kaniyang pananampalataya, hindi niya sinisimulan ang anumang programa niya nang hindi muna siya nagdarasal sa himpapawid.

Kuwento pa rin ng magaling-matapang na komentarista, “Kapag nag-iisa ka lang, doon mo mararamdaman ang kung anu-anong pag-aalala. Maiisip mo, napakaigsi pala ng buhay.

“Sa isang kumpas lang, puwede ka nang mawala. Marami kang iisipin, paano na ang mga anak at apo mo na mga bata pa? Kaya hindi talaga dapat tayo nakalilimot sa panghihingi ng gabay sa Panginoon. Anumang oras, puwedeng may mangyari sa atin,” sinsero niyang pahayag.

At noong hapon ng Pasko Ng Pagkabuhay ay nakatanggap kami ng mensahe mula kay Ted Failon, “Purihin ang Diyos! Negative result ang RT-PCR test ko po, ‘Nay, kalalabas lang.”

Kahapon ay nagsimula na uli siyang magtrabaho, work from home sila ni DJ Cha-cha sa kanilang apat na oras na programa tuwing umaga sa Radyo 5, TV5 at OnePH.

Cheryl Cosim – Nagpositibo sa swab test

Magdadalawang linggo nang work from home ang pag-ere ng magandang news anchor ng TV5 na si Cheryl Cosim. Nagpositibo siya sa swab test, wala siyang anumang kakaibang nararamdaman, pero kailangan niyang sumunod sa pinaiiral na quarantine ng network.

Sa panahong naka-quarantine si Yeng ay pumasok sa kaniyang isip ang napakaraming bagay. Aminado siya na naging praning siya, kung anu-anong istorya ang bumabagabag sa kaniya, puro paano na ang tanong niya sa hangin.

Text sa amin ni Yeng noong mga unang araw ng kaniyang quarantine, “I get anxiety attacks, grabe pala ang ganitong pakiramdam, it really messes your mind. Emotionally, parang roller coaster ride ang pinagdadaanan ko.”

Naging panahon din iyon ng pagbalik niya sa nakaraan. Tanong daw ni Yeng sa kaniyang sarili, naging mabuting tao ba siya, mayroon ba siyang nasaktang mga tao sadya man iyon o aksidente lang?

“Ang haba-haba ng maghapon. Now, I know, kung ano ang feeling ng mga nagpa-positive, lalo na iyong mga nagpapaospital na walang kahit sinong kasamang bantay!

“Salamat sa Diyos dahil wala naman akong ibang nararamadman, as in wala, kinakabahan lang talaga ako. Iba, e. Iyong parang fear ang babalot sa buong pagkatao mo,” pahayag pa ni Yeng.

Maraming nagpositibo sa TV5, kasama na si Ted Failon na ngayon ay nakabalik na sa ere sa pamamagitan ng work from home, maagap ang network sa kapakanan ng kanilang mga nasasakupan.

Ang Cristy Ferminute ay sumasahimpapawid din mula Lunes hanggang Biyernes na work from home lang din kami ni Romel Chika. Maraming salamat dahil kahit watak-watak kami ng aming mga staff ay tumatako ang programa na konting-konti lang ang nagiging problema dahil sa internet.

Raffy Tulfo – Balik trabaho na

Dalawang linggong hindi nagtrabaho sa studio ng TV5 si Raffy Tulfo. Nag-quarantine siya dahil nagpositibo ang kaniyang driver. Nag-work from home lang muna ang matapang pero mapusong broadcaster.

Isang hapon sa Wanted Sa Radyo ay sinabi niya, ‘Sa darating na Monday po, e, magla-live na ako. Sa studio na ako magso-show. Hindi na sa bahay lang through phonepatch.

“Nakukunsensiya ako na ang buong staff ko, e, nagtatrabaho sa studio, samantalang ako, nasa kuwarto ko lang na naka-aircon ako, napakakumportable.

“Kailangan ko silang samahan sa programa, dapat kaming sama-sama, kaya sa Monday, live na ako,” makabuluhang sabi ng sikat na news anchor-komentarista.

Ibang-iba kapag siya ang nakaupo sa sumbungang silya ng ating mga kababayan. May diin ang kaniyang dating, may ngipin ang kaniyang mga salita, wala siyang inuurungang kahit sino kapag siya ang nasa tama.

Panahon ngayon ni Raffy Tulfo. Siya ang pinakasikat sa kanilang magkakapatid dahil sa dami ng programang ipinagkakatiwala sa kaniya ng Cignal OnePH at TV5. May pahinga pa ba siya?

Mayroon siyang Idol In Action sa tanghali, umeere naman ang kaniyang Wanted Sa Radyo tuwing hapon (bago ang Cristy Ferminute), nand’yan pa ang Wanted: Ang Serye tuwing Sabado nang gabi na siya ang nagtatahi ng mga istoryang isinusumbong sa kaniya.

“May mga time na sa dressing room na lang ako nagpapahinga. Maigsi lang ang ipinaghihintay ko mula alas dose hanggang alas dos, kaya kesa umuwi pa ako, doon na lang ako sa dressing room.

“Pero umuuwi ako pagkatapos ng Wanted Sa Radyo para maligo naman muna bago ako sumalang sa Frontline Pilipinas, tatlong programa ang ginagawa ko araw-araw.

“Kahit pagod, masaya ako sa trabaho ko, marami akong natutulungan sa abot ng aking makakaya, nabibigyan ko ng pag-asa ang mga kababayan nating walang kalaban-laban lalo na pagdating sa batas,” pasasalamat pa ng nakakatakot lang pero madaling mahaling broadcaster.

Grabe ang suportang ibinibigay ng ating mga kababayan sa kaniya, lalo na ng mga OFW, nasa dalawampung milyon na ang kaniyang followers sa You Tube.

Ganoon din katindi ang mga tagasubaybay ni Raffy Tulfo sa Facebook, mayroon pa siyang Tik-Tok at pati ang Lyka ay nakopo na rin niya.

Panalung-panalo!

Dennis Padilla – Nagpositibo rin sa COVID-19

Matinding sakripisyo at paghihirap ang pinagdaanan ng magaling na komedyanteng si Dennis Padilla sa COVID-19. Agresibo ang virus na umatake sa kaniya, akala niya ay iyon na ang kaniyang katapusan, sobra-sobra ang pasasalamat niya ngayon sa ikalawang buhay na ipinagkaloob sa kaniya ng Diyos.

Noong magpositibo siya at kinailangan nang isugod sa ospital ay isa lang ang naging tanong ni Dennis sa kaniyang sarili, “Lord, kukunin n’yo na po ba talaga ako?”

Ayon sa komedyante ay biglang bumiyahe sa nakaraan ang kaniyang isip, naalala niya ang kaniyang mga anak, lalo na ang maliliit pa na nangangailangan ng kaniyang suporta at pagmamahal.

Puro dasal ang kaniyang ginawa, iyon ang pinagkunan niya ng lakas sa paglaban, kapag ganoon daw kasing parang nasa gilid ka na ng bangin at sa isang pitik lang ay mahuhulog na ay wala ka nang ibang gagawin kundi ang tumawag sa Diyos at magsisi.

“Nag-iisa lang ako, walang puwedeng magbantay sa akin, pero napakalaking tulong sa akin ang mga messages ng mga anak ko. Iyong sabihan ka lang nilang hindi ako nag-iisa, matinding lakas na ang ibinibigay noon sa akin,” naluluhang pag-alala ng magaling na payaso.

Kapag nagkita raw sila ni Gerald Anderson ay isa lang ang kaniyang sasabihin sa aktor, “Maraming salamat dahil lumantad ka na. Salamat dahil dahil mahal mo ang anak ko (Julia). Salamat at ipinagtatanggol mo siya.

“Alam mo naman, tatay ako, kung saan maligaya ang anak ko, doon na rin ako,” madiin pang pahayag ni Dennis Padilla.

Joseph Estrada – Mabuti na ang kalagayan

Patuloy ang pagganda ng kundisyon ni dating Pangulong Joseph Estrada. Tinanggal na ang mga aparatong tumutulong sa kaniyang paghinga pero kinailangan siyang dalhin sa ICU para mas mabantayan nang husto ang kaniyang sitwasyon.

Pakiusap lang sa mga taong ginagawang biro ang pagkakasakit ng ating kapuwa. Milyon-milyon ang nagkakasakit ngayon na matinding panalangin ang inuusal para sa posibleng pagdudugtong pa sa kanilang buhay.

Tigilan na sana ng mga walang magawa sa buhay ang pagpapakalat ng balitang patay na ang isang maysakit na umaamot pa ng isang pagkakataong pahiramin ng panibagong buhay ng Diyos.

Huwag gawing biro ang COVID-19. Hindi natin nakikita ang ating kalaban. Huwag naman sana pero paano kapag ang mga tao namang walang kunsensiya ang mabiktima? – CSF