O, Canada, Pinoy Ako

Ang aking pag-asang naging agaw-buhay
ay muling sumigla sa iyong kandungan;
Sa iyong alindog ang lupang hinirang,
May kahati ngayon sa puso’t isipan!

***

Sinisinta kita nang taos sa puso,
Pag-ibig na tunay, malabong maglaho;
Sa kapighatian ako ay hinango,
Asahan ang sukling tapat na pagsuyo!

***

Kandugang malusog nang aking lisanin
ay hindi dahilang ganap na limutin;
Ako’y magbabalik sa bayan kong giliw,

Ang lupang may unang pitak sa damdamin!

***

Dating sakdal tatag ng paninindigan,
Dahil sa ganda mo, naging salawahan!

 Paquito Rey Pacheco