• Krosword ni Gerry Gamurot
    Eh Kasi, Pinoy!

    Krosword

    ni Gerry Gamurot
  • Building Science by Norman Aceron Garcia
    Features

    Building Science

    by Norman Aceron Garcia

Published on

Batang North End ni Noel Lapuz

Balak kong tumakbo sa Point Douglas

ni Noel Lapuz

   noel1
 
Batang North End with 10k Runners at the Lace up for Diabetes 2016 run
  noel2
 
Noel's running buddies (l-r): Freedom Lapuz, Mariecarl Nues,
Gideon Gatpayat and Janos Saluta

Noong nagpasya akong tumakbo na nagkataong panahon ng eleksiyon sa Manitoba at Pilipinas ay marami ang nagtanong kung tatakbo daw ako sa politika. May mga kaibigan din akong nasa Taguig ang nagtanong kung uuwi daw ba ako sa Pilipinas para tumakbo sa Taguig. Sinadya kong maging creative ang opisyal kong pagpapahayag ng aking plano para tumakbo sa pamamagitan ng Batang North End at ng aking mga posts sa Facebook. At siyempre, tulad ng aking inaasahan, marami ang nagtanong, marami ang nagtaas ang kilay at marami din siguro ang nag-abang kung totoo nga ang aking pagtakbo. At tulad ng aking sinabi at sinulat, tinotoo ko ang aking pagtakbo sa Tyndall Park.

Sa Tyndall Park area ginanap ang Freedom Run ng St. Peter’s Church. Ito ang kauna-unahan kong 10k run sa buong buhay ko. Sa simbahan ko unang inialay ang aking unang takbo. Ito ay isang fund raising para sa pagpapatayo ng bagong simbahan para sa lumalaking parishioners ng St. Peter’s Church. Masarap ang feeling na tumakbo para sa komunidad ng simbahan. Sa susunod na mga taon ay asahan ninyo ang aking pagtakbong muli sa Tyndall Park area. Malay ninyo, hindi lang 10k run ang takbuhin ko para sa aking mahal na komunidad sa Tyndall. Abangan ninyo ang opisyal kong pahayag at filing ko ng registration para sa aking pagtakbo sa Tyndall area na sakop ng Point Douglas.

Ang pangalawa kong takbo ay noong Mayo para naman ito sa kampanya para sa awareness at paglunas sa diabetes. Sa Assiniboine Park ito ginanap at kasama ko dito ang mga pamangkin at running buddies ko na sina Gideon Gatpayat, Mariecarl Nues, at Janos Saluta. Kung kailan ako tumanda ay ngayon pa ako na-hooked sa pagtakbo kaya’t kapag kasama ko ang mga binata’t dalagang ito ay nagmimistulan akong Ama nilang tatlo dahil sa puti ng buhok ko. Pero ayos lang, masayang tumakbo nang may kabuluhan. Sa aking pangalawang takbong ito na tinawag na Lace Up for Diabetes ay natanggap ko ang aking kauna-unahang finisher medal. Wow! Iba ang feeling. Para akong valedictorian kahit hindi naman.

Ang pangatlo kong takbo ay nitong Hunyo para naman sa Huntington’s disease, isang uri ng sakit sa isip. Dito ko nakasamang tumakbo ang mga pamilya, supporters at mismong mga pasyente na may ganitong uri ng karamdaman. Nakaka-touch na makitakbo kasama sila. Dito ko lalung na-realize ang kahalagahan ng kalusugan ng katawan at pag-iisip. Dito ko naisip na marami talaga tayong dapat ipagpasalamat at ipagdiwang sa araw-araw ng ating buhay. Kaya’t ituloy lang natin ang pagtakbo. Samahan ninyo ako. Sabay tayong tumakbo.

Noong Father’s Day ay isang pinaka-the-best na regalo ang aking natanggap mula sa aking panganay na anak na si Freedom. Sabay kaming tumakbo ng 10k para sa 38th Manitoba Marathon. Bagama’t alam kong hindi niya hilig ang pagtakbo ay sinamahan niya ako at sabay naming tinapos ang takbo. Dama ko ang kaniyang hirap sa pagtakbo pero hindi siya sumuko. Ipinakita niya sa akin na kaya niya. Isang saludo para sa aking panganay at thank you sa iyong pagiging mabuting anak at pagiging mabuting tao at pagiging alagad ng sining. Si Freedom ay isang songwriter. Para kay Freedom, kay Franco, Francis at sa aking asawa na si Manang Gee ang aking tinakbo noong Father’s Day.

Hindi pa po tapos dahil patuloy ang aking pagtakbo. Sa July 31 ay tatakbo ako ng 16k mula Winnipeg Beach papuntang Gimli. Ito ay isang araw bago ang pagdiriwang ng Terry Fox Day. Alam naman nating lahat ang kabayanihan ni Terry para sa cancer research sa pamamagitan ng pagtakbo niya sa kabila ng pagiging putol ang isang paa at binti. Para sa ipinaglaban at itinaguyod ni Terry ang takbo kong ito sa July 31.

Marami pa akong naka-line-up na takbo ngayong taong ito. Hahaba nang husto ang aking article kapag inisa-isa ko pa.

Ang pagtakbo ko ay para sa kalusugan. Ang pagtakbo ko ay simbolo ng aking pakikiisa sa ating komunidad. Ang pagtakbo ko ay bahagi ng aking patuloy na pag-aaral at pagyakap sa iba’t ibang kultura at kalinangan. Ang pagtakbo ko ay para isulong ang masaya, mapayapa at nagmamahalang komunidad. Ang pagtakbo ko ay para sa pagbabago.

Pinag-iisipan din ng inyong lingkod, Noel Lapuz kung tatakbo siya sa Point Douglas. Ano sa palagay ninyo? Panahon na ba?

Heto ang link para sa mga interesado: Manitoba Runners Association

Si Noel Lapuz ay dating OFW sa Middle East (Dubai at Qatar). Nagtrabaho nang sampung taon sa City Hall ng Taguig bilang Human Resource Management Officer. Naging bahagi ng Bata-Batuta Productions bilang manunulat, entertainment host at stage actor. Nagtatag ng Kulturang Alyansa ng Taguig. Kasapi ng Ecumenical Movement for Justice and Peace (EMJP).

Have a comment on this article? Send us your feedback