• Krosword ni Gerry Gamurot
    Eh Kasi, Pinoy!

    Krosword

    ni Gerry Gamurot
  • Building Science by Norman Aceron Garcia
    Features

    Building Science

    by Norman Aceron Garcia

Published on

Pilantik ni Paquito Rey PachecoPebrero 16 – 28, 2017

ni Paquito Rey Pacheco

Ang kasalukuyan ay buwan ng puso – may tibok man o wala, ito ang batayan ng buhay. May kani-kaniyang hanap na kaligayahan ang mga tao na nasa iba’t ibang sektor ng lipunan.


Muling binuksan ang Family Class sponsorship dito sa Canada. Opo, pero kailangang may sapat kang pera. Sa halip na magaan, mabigat ang financial requirements. Applications – only on line.


Dulot ng bagong patakaran sa immigration ng Trump administration, may mga Filipino sa US na nais dito sa Canada manirahan at maghanapbuhay. Malaki ang pag-asa noong mga may alam na trabaho na kailangan ng Canada.


Ang planong devaluation ng US dollar ni US President Trump ay tiyak na magkakaroon ng epekto sa international money market. Maaaring pabor o hindi sa mga bansang ang kanilang pera ay nakatali sa US currency.

Pilipinas

Sanhi ng nangyaring lindol sa Surigao, maraming naninirahan sa dakong silangan ng Luzon ang labis na nangangamba. Ang nabanggit na lugar umano ay kasama sa ring of fire. Ang gobyerno ay naglaan ng two billion pesos na pantulong sa mga nasalanta ng lindol sa Surigao. Under the state of calamity ngayon ang nabanggit na lugar ng Mindanao.


Nakatutok pa rin ang gobyernong DU30 sa katuparan ng pinangakong pagbabago sa pamamahala noong 2016 elections. Ang mga maganda at pangit na senaryo ang nakakapigil ngayon. Grabe ang kalagayan sa katahimikan at kaayusan ng bansa. Ang mayayaman ang lalong pinayaman. Ang mga nasa middle class at dati nang hikahos sa kabuhayan ay lalong nabaon sa kahirapan. May mga kagawad ng PNP na dapat mangalaga sa kayusan ng bayan subalit mismong sila ang naging problema ng gobyerno. Halimbawa ay ang tungkol sa illegal drug na sila rin ang agent and protectors ng mga nasa negosyo ng bawal na gamot.


Ang independent foreign policy ng bansa na pinatutupad ni President DU30, bagaman nasa 1987 Konstitusyon na malaong nakagapos sa interest ng mga namumuno sa Estados Unidos ng Amerika ay sinisikap na maharang. Hinahanapan ng butas ng kaniyang mga kalaban sa politika ang kampanyang pagbabago sa pamamahala ng Presidente. Pinakamalapit na motibo ay mapatalsik ang pangulo sa hawak na kapangyarihan.


Sana hindi na patulan ng mga mamamayan ang word-war sa pagitan ng gobyerno at mga alagad ng Simbahang Katolika. Marami din namang Pari at Obispo ang walang kibo, sapagkat alam nilang ang lahat naman ng tao ay may iwing kasalanan. Sabi nga ni Cardinal Ricardo Vidal, siya ay naniniwalang si president DU30 ay good person na kailangang ipagdasal kahit we like him or not. Opo naman. Walang taong perpekto.


Ang super majority sa kapulungan ng mga kongresista at senador ay mahinang political foundation ng gobyernong DU30. Walang iniwan ‘yon sa bahay-bahayan ng mga bata. Pagkatapos ng laro, basta iiwanan na lang.


Sa patakarang panlabas naman ng DU30 administration, may mga tao na hindi iyon binibigyan ng halaga. Masama bang magkaroon ng mga kaibigang bansa na makakatulong sa katatagang pangkabuhayan ng mga Filipino?


Makabayan si Digong. Nationalist. Kasi naman, ang karaniwang palagay ng mga nasa Washington sa nasyonalista at komunista ay pareho. Ang pangulo ay hindi kaparis ng dalawang tao na nasa The Hague, Netherland na may pansariling adyenda. Sina Luis Jalandoni at Jose Maria Sison na kinikilanag nagtatag ng NDF ay waring nahihirapan nang mamuhay sa ibayong dagat. Marahil isang dahilan kaya muling nakikiusap kay President Duterte na ipagpatuloy ang nabasag na peace talk. Ang problema nila ngayon ay tila wala nang tiwala sa kanila ang mga pinuno ng CPP-NPA. Inaani na nila ngayon ang bunga ng doktrinang kanilang tinanim sa damdamin at utak ng Chinese Maoist na mga Filipino.


Hinangad ni Pangulong Duterte na magkaroon ng pagkakaisa at maiwasan ang patayan, subalit ang panahon ng tigil-putukan ay hindi ginalang ng CPP-NPA. May naririnig na ba kayong kondenasyon mula sa mga lider ng Simbahang Kristiyano tungkol sa ginawi ng mga rebelde? Waring hindi sila interesado sa isyu ng nagpapatayang mga kapuwa Filipino. Ang mga nananahimik na mamamayan na napapagitna sa labanan ay nagsisilikas mula doon sa magulong lugar ng Mindanao. Malabo nang mangyari ang pangarap ng Maoist movement na sila ay makapagtatag ng Communist State sa Pilipinas. Maliwanag na ‘yon sa kabila ng nagiging katulong pa nila ang mga nasa kontra partido ni DU30.


Ngayon ay unti-unti nang nagkakaroon ng resulta ang ginawang pakikipagkaibigan ni President Duterte sa ibang bansa, tulad ng China, Japan at EU. Ang Vice Foreign Minister ng China, Liu Zhenmin ay nangako ng additional $24 billion for regional security and increased economic partnership para sa Pilipinas. Ang Japan Prime Minister Shinzo Abe naman ay nangako din ng $ 8.6 billion investment sa loob ng limang taon para sa modernization of the Philippine military, infrastructure and other projects. Hindi lang para sa Mindanao kundi sa iba pang lugar ng bansa.


Nagbabala si President DU30 sa American military forces na huwag maglagak ng kanilang armas sa Pilipinas sa gitna ng sitwasyon tungkol sa South China sea territorial dispute. Ang US ay may limang Philippine Military bases na pinagagamit sa US Military Forces. Sinabi ni President Duterte na may kasunduan na sila ni Chinese President XI Jingping tungkol sa West Philippine Sea, regarding the Hague case na pabor sa Pilipinas.


Isang test case sa kapulungan ng mga kongresista ang nakaumang na impeachment complaint vs Ombudsman Conchita Carpio-Morales for negligence of public trust. At least, one-third vote ng mga kongresista ang kailangan bago maisampa sa Senado ang kaso for judgement. Gayun din ang panukalang pagbabalik ng parusang kamatayan na nakaumang sa kapulungan ng mga kongresista. Ang panukala ay mahigpit na tinututulan hindi lang ng Church leaders kundi ng mayoryang bilang ng mga mamamayan.


Malalaman na rin kung gaano katatag ang super majority sa dalawang kapulungan ng kongreso. Nakatakda sa 2019 ang mid-term elections. Tiyak na magkakaroon ng political realignment sa pagitan ng mayorya at minoryang partido.


Binalita ni VP Leni Robredo na titular head ng LP, na may dalawang meetings nang dinaos ang kanilang partido. Naghahanda na para muling makabalik sa kapangyarihan ang partidong kung baga sa tao ay nagkaroon ng stage four cancer noong 2016 elections. Ang political status ngayon ni senator Leila de Lima ng LP ay waring nasa end of the road na.


Ang infrastructure projects ng China, Japan, Russia at iba pang foreign investments sa Gitnang Silangan, kabilang ang Pilipinas kung matutuloy ay hindi matatawaran. Malaki ang pag-asang magdudulot ng maraming trabaho para sa mga Filipino.

Hindi lamang trabaho na dulot ng infrastructure project ang nasa plano ni President DU30. Ang pangkabuhayan ng mga nasa rural areas ng bansa ang tututukan. Nabalitang may plano si President DU30 na tularan, ipagpatuloy ang ginawa noong Marcos era. Halimbawa ang Masagana 99 for farmers at Biyayang Dagat programs para sa mga mangingisda.

Katas

Ang ugat ng problemang dulot ng illegal drug campaign ng DU30 administration ang nakababahala sa mga lider ng Simbahan. Opo, subalit lahat ng gulo na nangyayari sa balat na lupa ay kagagawan ng tao.

  • Hindi po ba ang kahirapan, corruption, walang mapasukang trabaho at mga tiwaling asal ng mga naglilingkuran sa gobyerno ang ugat ng problema?
  • Kapit sa patalim ang mga hikahos sa kabuhayan. Pagsasamantala naman ng mga may katungkulan sa pamahalaan.
  • Lahat ng tao ay makasalanan. Sa mga alagad ng Simbahan wala bang korap? Ang Santo Papa ang mismong nanawagan at humingi ng paumanhin sa pagiging hypocrite ng mga pari at obispo.
  • Lahat ng gulo na nangyayari sa lupa ay kagagawan ng tao. May mga naniniwalang ang kasalanan ay nawawala sa pamamagitan ng kumpisal sa pari. Marahil nga, basta huwag lang uulitin? Sinusunod ba?

Kasabihan

Madaling mangarap at mangako, ang katuparan ay malabo.

Paunawa: Ang mga paksa at salitang nakasaad sa Pilantik ay sariling opinion ng may-akda at maaaring hindi opinion ng mga taga-lathala ng Pilipino Express.

Have a comment on this article? Send us your feedback